Formula-1 тарихида янги рекорд ўрнатилди
«Мерседес» жамоасининг италиялик пилоти Кими Антонелли Formula-1 тарихидаги энг ёш жаҳон чемпионига айланди. 20 ёшли пойгачи Мексика Гран-присида учинчи ўринни эгаллаб, мавсум якунланишига тўртта пойга қолганида чемпионликни муддатидан аввал қўлга киритди. Бу ҳақда Reuters агентлиги хабар бермоқда.
Манбага кўра, Антонелли 20 ёш-у 68 кунлигида чемпионликни қўлга киритиб, 16 йилдан бери янгиланмай келаётган рекордни янгилади. Италиялик пилотга Мексикадаги пойгани тўққизинчи ўринда якунлашнинг ўзи кифоя эди. Бироқ у учинчи бўлиб маррага етиб келди ва умумий ҳисобда энг яқин таъқибчисидан 119 очкога ўзиб кетди.
Мексика Гран-присида «Red Bull» вакили Макс Ферстаппен ғалаба қозонди, «Ferrari» пилоти Льюис Хэмилтон иккинчи ўринни эгаллади. Антонелли эса учинчи поғонадан жой олиб, фаолиятидаги илк жаҳон чемпионлигини нишонлади. Ёш пойгачи маррага етиб келганидан сўнг қувонч кўз ёшларини тия олмади.
Маълумот учун, Formula-1 тарихидаги энг ёш жаҳон чемпиони рекорди аввал Себастьян Феттельга тегишли эди. Немис пойгачиси 2010-йилда 23 ёш-у 134 кунлигида чемпион бўлган. Антонелли эса Италияга 1953-йилда Альберто Аскари эришган муваффақиятдан кейинги илк Formula-1 жаҳон чемпионлигини тақдим этди.
