Жаҳон чемпионатидан кейин фаолияти издан чиққан Балогун яна гол урди
“Монако” ҳужумчиси Фоларин Балогун узоқ танаффусдан сўнг яна гол уришга муваффақ бўлди. АҚШ терма жамоаси футболчиси Франция чемпионатида “Париж”га қарши учрашувда рақиб дарвозасини ишғол қилиб, жаҳон чемпионатидан кейинги илк голини қайд этди. Бу ҳақда The Guardian нашри хабар бермоқда.
Манбага кўра, Балогун учун сўнгги ойлар анча мураккаб кечган. Жаҳон чемпионатидаги баҳсли қизил карточкадан сўнг унинг “Эвертон”га трансфери ҳам амалга ошмай қолган. Футболчи тиббий кўрик билан боғлиқ жараёндан норози бўлгани сабабли Англия клубига ўтиш имкониятини бой берган.
“Монако”нинг янги бош мураббийи Филипе Луис ҳам Балогунга мунтазам ўйин амалиёти бермаяпти. Ҳужумчи Конференциялар лигаси учун рўйхатдан четда қолган. Шунга қарамай, у “Париж”га қарши баҳснинг иккинчи бўлимида майдонга тушиб, 66-дақиқада гол урди. Бироқ “Монако” учрашувда 1:3 ҳисобида мағлуб бўлди.
Маълумот учун, Балогун ўтган мавсум Франция чемпионатида 13 та гол урган. Унинг келажаги ҳозирча ноаниқ бўлиб, январдаги трансфер ойнасида бошқа клубга ўтиши мумкинлиги муҳокама қилинмоқда. Футболчига Англия Премьер-лигаси ва Италия клубларидан қизиқиш борлиги айтилмоқда.
