Футболда офсайд қоидасини ўзгартириш бўйича Венгернинг таклифи қўллаб-қувватланмади
FIFAнинг футболни ривожлантириш бўйича раҳбари Арсен Венгер томонидан илгари сурилган офсайд қоидасини ўзгартириш таклифи кутилган натижани бермади. Янги тартиб Канада чемпионатида синовдан ўтказилган бўлса-да, мутахассисларнинг дастлабки баҳолашида етарлича қўллаб-қувватланмади. Бу ҳақда BBC Sport нашри хабар бермоқда.
Манбага кўра, Венгернинг таклифига биноан, ҳужумчининг танасидаги гол уриш мумкин бўлган бирор қисми ҳимоячи билан бир чизиқда турган бўлса, офсайд қайд этилмайди. Ушбу тизим Канада Премьер-лигасининг 2026 йилги мавсумида синовдан ўтказилди. Натижада 112 та учрашувда офсайд ҳолатлари сони 54 фоизга камайган ва қўшимча 13 та гол қайд этилган.
Бироқ янги қоида футболчиларнинг майдондаги жойлашувига ҳам таъсир кўрсатган. Хусусан, ҳимоя чизиқлари ўртача уч метр орқароққа силжиган. Бу эса айрим вазиятларда ҳимоядаги жамоаларга қўшимча қийинчилик туғдирган. Шу сабабли IFABнинг маслаҳат кенгашлари тажрибани кенгайтиришга етарлича қизиқиш билдирмаган. Ҳозирча қоида юзасидан якуний қарор қабул қилинмаган.
Маълумот учун, Арсен Венгер офсайд қоидасини ўзгартириш ғоясини дастлаб 2020 йилда илгари сурган эди. Унинг асосий мақсади ҳужумкор футболни рағбатлантириш ва баҳсли офсайд қарорларини камайтиришдан иборат. Футбол қоидаларига ўзгартириш киритиш ваколати IFAB ташкилотига тегишли бўлиб, янги таклифлар 2027/28 йилги мавсум олдидан яна муҳокама қилиниши мумкин.
