Флойд Мейвезер яна рингга қайтишини эълон қилди
Профессионал фаолиятини мағлубиятсиз якунлаган америкалик бокс афсонаси Флойд Мейвезер навбатдаги кўргазмали жангида иштирок этиш ниятини маълум қилди. 49 ёшли собиқ жаҳон чемпиони 19 декабрь куни Таиланднинг Бангкок шаҳрида австралиялик Мэтти Флойдга қарши рингга чиқишни режалаштирмоқда. Бу ҳақда talkSPORT нашри хабар бермоқда.
Манбага кўра, Мейвезер бўлажак жанг ҳақида ижтимоий тармоқлардаги саҳифасида эълон қилган. Америкалик боксер мазкур тўқнашувни Райан Гарсияга қарши эҳтимолий профессионал жанг олдидан тайёргарлик сифатида кўраётганини билдирган.
Бироқ Мейвезернинг қайтиши билан боғлиқ режалар ҳозирча якуний тасдиқланган жанглар тақвими сифатида қаралмаяпти. Сабаби аввалроқ унинг Майк Тайсон ва Мэнни Пакьяога қарши ўтказилиши кутилган айрим жанглари амалга ошмаган эди.
Маълумот учун, Флойд Мейвезер профессионал боксда 50 та жанг ўтказиб, уларнинг барчасида ғалаба қозонган. Унинг эҳтимолий рақиби Мэтти Флойд эса профессионал фаолиятида 15 та ғалаба ва икки мағлубият қайд этган.
