Dana Uayt Volkanovski va Getji o‘rtasida superjang tashkil etishga tayyor
UFC rahbari Dana Uayt yarim yengil vazn chempioni Aleks Volkanovski hamda yengil vazn chempioni Jastin Getji o‘rtasida jang tashkil etilishi mumkinligini ma’lum qildi. Tashkilot rahbari ushbu bellashuvga qarshi emasligini, biroq yakuniy qaror Getjining kelajakdagi rejalariga bog‘liqligini bildirdi. Bu haqda Uayt The Jim Rome Show dasturida ma’lum qildi.
Manbaga ko‘ra, Volkanovski faoliyatining so‘nggi bosqichida yana bir vazn toifasida chempionlikni qo‘lga kiritish imkoniyatini ko‘rib chiqmoqda. UFC rahbari avstraliyalik jangchining sportdagi xizmatlarini yuqori baholab, uning uchun katta ahamiyatga ega bo‘lgan bellashuvni tashkil etishga tayyorligini ta’kidlagan.
Biroq Jastin Getji hozircha faoliyatini davom ettirish yoki yakunlash borasida aniq qarorga kelmagan. UFC rahbariyati amerikalik chempion bilan muzokaralarni davom ettirmoqda. Agar Getji oktagonga qaytishga rozi bo‘lsa, Volkanovski bilan chempionlar jangi tashkil etilishi mumkin. Hozircha bellashuv rasman tasdiqlanmagan.
Ma’lumot uchun, Jastin Getji 2026-yil iyun oyida Oq uy hududida o‘tkazilgan UFC turnirida Ilia Topuriyani mag‘lub etib, yengil vazn toifasining mutlaq chempioniga aylangan edi. Aleks Volkanovski esa yarim yengil vazn toifasidagi chempionlik kamariga egalik qilmoqda.
