“Manchester Yunayted” hammuallifining bayonoti muxlislar noroziligiga sabab bo‘ldi
“Manchester Yunayted” hammuallifi Avram Gleyzer klubning tijoriy muvaffaqiyati maydondagi natijalarga to‘liq bog‘liq emasligini ta’kidladi. Uning futbol klubining moliyaviy barqarorligi haqidagi fikrlari muxlislar orasida norozilikka sabab bo‘ldi. Bu haqda The Athletic nashri xabar bermoqda.
Manbaga ko‘ra, Gleyzer sentabr oyida Londonda Deutsche Bank tomonidan tashkil etilgan sport investitsiyalari konferensiyasida ishtirok etgan. U yirik sport klublari muvaffaqiyatsiz mavsumlarda ham xalqaro bozordagi tijoriy mavqeini saqlab qolishi mumkinligini bildirgan.
“Manchester Yunayted” hammuallifi o‘z fikrini tushuntirish davomida klubni Amerikaning “Nyu-York Yankiz” va “Dallas Kovboys” jamoalari bilan taqqoslagan. Uning fikricha, katta tarix va xalqaro auditoriyaga ega sport brendlari sovrinlarsiz ham yuqori tijoriy daromad olish imkoniyatiga ega. Biroq bu yondashuv ingliz klubi muxlislari tomonidan tanqid qilinmoqda.
Ma’lumot uchun, Gleyzerlar oilasi 2005-yilda “Manchester Yunayted” ustidan nazoratni qo‘lga kiritgan. Klub 2013-yilda ser Aleks Fergyuson iste’foga chiqqanidan buyon Angliya Premyer-ligasida chempionlikni qo‘lga kirita olmagan.
