Qozog‘istonlik himoyachi Turkiyaning “Galatasaroy” klubiga o‘tishi mumkin
Sankt-Peterburgning “Zenit” klubi himoyachisi Nuralı Alip faoliyatini Turkiya chempionatida davom ettirishi mumkin. Qozog‘iston terma jamoasi futbolchisi “Galatasaroy”ga taklif etilgan va Istanbul klubi uning o‘yinlarini kuzatishni boshlagan. Bu haqda turkiyalik jurnalist Burak Erenga tayanib, Championat nashri xabar bermoqda.
Manbaga ko‘ra, 26 yoshli markaziy himoyachining nomzodi “Galatasaroy” rahbariyatiga taqdim etilgan. Klub mutasaddilari futbolchining imkoniyatlarini o‘rganmoqda. Uning Qozog‘iston fuqaroligiga ega ekani Turkiya chempionatidagi ro‘yxatdan o‘tkazish qoidalari nuqtayi nazaridan ham qulaylik yaratishi mumkin.
Hozircha Istanbul klubi tomonidan “Zenit”ga rasmiy transfer taklifi yuborilgani haqida ma’lumot yo‘q. Shuningdek, futbolchining o‘zi ham ehtimoliy transfer yuzasidan ochiq bayonot bermagan. Muzokaralar boshlangani yoki kelishuvga erishilgani tasdiqlanmagan.
Ma’lumot uchun, Nuralı Alip 2023-yildan buyon “Zenit” safida faoliyat yuritmoqda. Uning Rossiya klubi bilan amaldagi shartnomasi 2028-yilgacha mo‘ljallangan. Joriy mavsumda himoyachi barcha musobaqalarda 12 ta uchrashuvda maydonga tushgan.
