Қозоғистонлик ҳимоячи Туркиянинг «Галатасарой» клубига ўтиши мумкин
Санкт-Петербургнинг «Зенит» клуби ҳимоячиси Нурали Алип фаолиятини Туркия чемпионатида давом эттириши мумкин. Қозоғистон терма жамоаси футболчиси «Галатасарой»га таклиф этилган ва Истанбул клуби унинг ўйинларини кузатишни бошлаган. Бу ҳақда туркиялик журналист Бурак Эренга таяниб, Чемпионат нашри хабар бермоқда.
Манбага кўра, 26 ёшли марказий ҳимоячининг номзоди «Галатасарой» раҳбариятига тақдим этилган. Клуб мутасаддилари футболчининг имкониятларини ўрганмоқда. Унинг Қозоғистон фуқаролигига эга экани Туркия чемпионатидаги рўйхатдан ўтказиш қоидалари нуқтаи назаридан ҳам қулайлик яратиши мумкин.
Ҳозирча Истанбул клуби томонидан «Зенит»га расмий трансфер таклифи юборилгани ҳақида маълумот йўқ. Шунингдек, футболчининг ўзи ҳам эҳтимолий трансфер юзасидан очиқ баёнот бермаган. Музокаралар бошлангани ёки келишувга эришилгани тасдиқланмаган.
Маълумот учун, Нурали Алип 2023 йилдан буён «Зенит» сафида фаолият юритмоқда. Унинг Россия клуби билан амалдаги шартномаси 2028 йилгача мўлжалланган. Жорий мавсумда ҳимоячи барча мусобақаларда 12 та учрашувда майдонга тушган.
