Lamin Yamal Xitoyda yolg‘on axborot qurboniga aylandi
Kataloniyaning "Barselona" klubi hujumchisi Lamin Yamal Xitoy ijtimoiy tarmoqlarida tarqalgan soxta skrinshot sababli katta mojaro markazida qoldi. Bu haqda World Journal nashri xabar bermoqda.
Manbaga ko‘ra, internetda ispaniyalik futbolchi go‘yoki Instagram sahifasida osiyoliklarni kamsituvchi animatsion videoni ulashgani aks etgan skrinshot tarqalgan.
Mazkur holat xitoylik muxlislarning keskin noroziligiga sabab bo‘ldi. Ular futbolchini irqchilikda ayblab, undan omma oldida uzr so‘rashni talab qilishdi. Hatto Xitoy davlat televideniyesi ham La Ligadan rasmiy izoh so‘radi.
Biroq Ispaniya futbol ligasi mazkur skrinshot ataylab soxtalashtirilganini va Yamal bunday videoni umuman ulashmaganini ma’lum qildi. Eslatib o‘tamiz, yaqinda Kilian Mbappe ham Xitoyda katta tanqidlarga uchragan edi.