Вали Султонов: «Биз учун ҳар бир очко олтинга тенг»
Бугун Суперлигада 23-тур баҳсларига старт берилди. Илк ўйин Фарғонада – «Нефтчи» ҳамда «Хоразм» жамоалари ўртасида бўлиб ўтди.
Рости, ўйиндан олдин ҳамма пешқадам – «Нефтчи»нинг ғалабасини тахмин қилганди. Бироқ «Истиқлол» стадионида сенсация қайд этилди. «Хоразм» тахминларни оқламади ва мезбонларга муносиб қаршилик кўрсатди.
Меҳмонлар икки марта ҳисобда олдинга чиқиб олишди. Фарғоналиклар эса мағлубиятдан қутулиб қолди ва баҳс 2:2 ҳисобидаги дуранг билан якунланди.
Ўйиндан кейин урганчликлар бош мураббийи Вали Султонов матбуот анжуманида қатнашди.
- Бугунги учрашувга тўхталадиган бўлсак, кўриб турибсизлар, «Нефтчи» жамоаси турнир жадвалида биринчи ўринда келяпти. Бундай жамоа билан ўйнаш зўр. Биз ҳам яхши тайёргарлик кўргандик.
Кўрдинглар, бугун жуда чиройли ўйин бўлди. Биз учун ҳар бир очко олтинга тенг. Турнир жадвалидан келиб чиққан ҳолда мақсадимиз «Хоразм»ни Суперлигада сақлаб қолиш. Вилоятимиз ҳокими ҳам, раҳбарият ҳам катта қизиқиш билдиришиб, жамоамизга ёрдам бериб келишяпти.
- «Хоразм» юқори прессинг қўллаб ўйнади. Бу жамоанинг услубими ёки «Нефтчи»га қарши шундай тактика қўлланилдими?
- Биз «Нефтчи»нинг ўйинларини кўриб ўрганиб чиқдик, таҳлил қилдик. «Нефтчи» жуда кучли клуб. Прессинг билан ўйнайди ва биз шунга яраша тайёргарлик кўрдик. Биз ҳам ўзимиз қўллаган тактик услубимизда ўйнаб, қарши ҳужумларда ҳаракат қилдик ва голлар уриш имкониятларидан фойдаланишни футболчиларимизга алоҳида тушунтирган эдик», - дея Вали Султоновнинг сўзларини келтиради Tribuna.uz мухбири.
