«Пахтакор» футбол академияси жаҳоннинг энг кучли 50 талигига кирди
Швейцариянинг CIES тадқиқот маркази дунёнинг 49 та олий дивизион лигасида фаолият юритаётган академия битирувчилари сони (15 дан 21 ёшгача бўлган даврда клубда камида 3 мавсум ўтказган футболчилар), улар иштирок этган учрашувлар даражаси, майдондаги дақиқалар ва ўртача ёш кўрсаткичлари асосида йиллик глобал рейтингни эълон қилди.
Янгиланган рейтингда «Пахтакор» академияси 50,3 балл билан 46-ўринни эгаллади. 2025 йилги рейтингда жамоа академияси 34,1 балл билан 90-ўринни эгаллаганди.
«Пахтакор» академиясида тарбияланган 59 нафар футболчи фаолият юритмоқда. Уларнинг 6 нафари айни пайтда «шерлар»нинг асосий жамоасида ўйнамоқда.
Клуб бу борада Осиё футбол конфедерацияси клублари орасида топ-60 талигига кирган ягона жамоа сифатида қитъада 1-ўринни эгаллаб, Бразилиянинг «Крузейро» (49,8), Украинанинг «Шахтёр» (48,4), Англиянинг «Арсенал» (46,6), Хорватиянинг «Хайдук» (46,2) ва Португалиянинг «Порту» (45,5) клубларини ортда қолдирди.
Рейтингда Португалиянинг «Бенфика» клуби биринчи, Аргентинанинг «Ривер Плейт» ва «Бока Хуниорс» клублари иккинчи ва учинчи ўринларни эгаллаган.
