Гарри Кейн «Олтин тўп»ни Мбаппедан жуда кичик фарқ билан ютгани маълум бўлди
2026-йилги «Олтин тўп» мукофоти учун кураш кутилганидан ҳам кескин ўтган. «Бавария» ҳужумчиси Гарри Кейн якуний овоз беришда «Реал Мадрид» вакили Килиан Мбаппедан жуда кичик фарқ билан устун келган. Бу ҳақда France Football бош муҳаррири Венсан Гарсияга таянган ҳолда, GOAL нашри хабар бермоқда.
Манбага кўра, овоз бериш жараёнининг катта қисмида Мбаппе етакчилик қилган. Бироқ якуний босқичда Кейн кўпроқ овоз тўплашга муваффақ бўлган. Венсан Гарсия икки футболчи ўртасидаги фарқ жуда кичик бўлганини ва ғолибни аниқлаш осон кечмаганини таъкидлаган.
France Football вакилининг айтишича, жорий йилги фарқ 2024-йилда Родри ва Винисиус Жуниор ўртасида қайд этилган тафовутдан ҳам кичик бўлган. Ўша йили Родри «Олтин тўп»ни 41 очколик устунлик билан қўлга киритган эди. Ҳозирча Кейн ва Мбаппе ўртасидаги аниқ очколар фарқи эълон қилинмаган.
Маълумот учун, Гарри Кейн 2026-йилги «Олтин тўп» мукофотини қўлга киритиб, 2001-йилдан бери ушбу совринни ютган илк инглиз футболчисига айланди. Якуний рейтингда Мбаппе иккинчи, «Барселона» ҳужумчиси Ламин Ямал эса учинчи ўринни эгаллади.
