Килиан Мбаппе «Реал Мадрид» тарихидаги энг яхши беш футболчи қаторидан жой олди
«Реал Мадрид» ҳужумчиси Килиан Мбаппе клуб сафида энг қисқа вақт ичида 100 та гол урган футболчилар рейтингида бешинчи ўринга кўтарилди. Франциялик ҳужумчи ушбу маррага «Барселона»га қарши «Эль-Класико»даги дубль орқали эришди. Бу ҳақда Испаниянинг Diario AS нашри хабар бермоқда.
Манбага кўра, Мбаппе 100 та гол киритиш учун 116 та расмий учрашув ўтказган. Мадрид клуби тарихида Ференц Пушкаш ушбу натижага 100, Криштиану Роналду 106, Паиньо 111 ва Альфредо Ди Стефано 114 та ўйинда эришган. Мбаппе бу кўрсаткич бўйича бошқа кўплаб машҳур ҳужумчиларни ортда қолдирди.
Франциялик футболчи 2024 йилда «Реал Мадрид»га келганидан буён Ла Лигада 67 та, Чемпионлар лигасида 25 та гол урган. Қолган саккизта гол бошқа расмий турнирларда қайд этилган. Унинг 100-голи мадридликлар сафидаги иккинчи мавсумидан кейин, учинчи мавсум бошида киритилди.
Маълумот учун, Мбаппе «Реал Мадрид» тарихидаги энг яхши тўпурарлар рўйхатида 23-ўринга кўтарилиб, Фернандо Морьентеснинг натижасига тенглашди. У яна тўртта гол урган тақдирда клуб тарихидаги энг яхши 20 нафар тўпурар қаторидан жой олади.
