Канело Альварес чемпионлик камарини қайтариш учун рингга чиқади
Мексикалик бокс юлдузи Сауль “Канело” Альварес навбатдаги жангида мағлубиятсиз Кристиан Мбиллига қарши рингга чиқади. Томонлар супер ўрта вазн тоифасидаги WBC чемпионлик камари учун кураш олиб боради. Бу ҳақда MMA Fighting нашри хабар бермоқда.
Манбага кўра, жанг 31-октябр куни Саудия Арабистонининг Ар-Риёд шаҳрида ташкил этилади. Мусобақа “Mexico vs. the World” номи остида ўтказилади. Альварес аввалги жангида Теренс Кроуфордга имкониятни бой берганидан кейин яна чемпионлик камарини қўлга киритишга уринади.
Унинг рақиби Кристиан Мбилли эса профессионал фаолиятида ҳали мағлубиятга учрамаган. Мбилли сўнгги жангида Лестер Мартинес билан дуранг қайд этган. Шу боис Канело учун навбатдаги тўқнашув осон кечмаслиги кутилмоқда.
Маълумот учун, Кристиан Мбиллининг профессионал рекордида 29 та ғалаба ва битта дуранг бор. У 24 та жангини нокаут билан якунлаган. Турнирда Хайме Мунгуя, Рафаэль Эспиноса ва бошқа таниқли боксчилар ҳам иштирок этиши режалаштирилган.
