Андер Эррера очиб берди: Месси, Неймар ва Мбаппе билан боғлиқ муаммо
ПСЖнинг собиқ ярим ҳимоячиси Андер Эррера Лионель Месси, Неймар ва Килиан Мбаппе бир жамоада ўйнаган даврдаги муаммолар ҳақида гапирди. Испаниялик футболчининг фикрича, Париж клубида бир вақтнинг ўзида бир нечта етакчи юлдузнинг тўпланиши жамоа ичидаги мувозанатни сақлашни қийинлаштирган. Бу ҳақда Championat нашри хабар бермоқда.
Манбага кўра, Эррера “El Camino de Mario” подкастида ПСЖдаги фаолиятини эслаб, кучли таркибнинг ўзи муваффақият учун етарли эмаслигини таъкидлаган. Унинг фикрича, жамоада масъулият ва етакчилик вазифалари аниқ тақсимланиши керак.
Собиқ ярим ҳимоячи таркибда Месси, Неймар, Мбаппе ва Серхио Рамос каби юлдузлар бирга тўп сургани мураббийлар учун мураккаб вазият яратганини айтган. Эрреранинг фикрича, бир жамоада бир вақтнинг ўзида бир нечта футболчига алоҳида имтиёз берилиши ички мувозанатга салбий таъсир кўрсатиши мумкин.
Маълумот учун, Лионель Месси 2021–2023-йилларда ПСЖ шарафини ҳимоя қилган. У бу даврда Неймар ва Мбаппе билан бирга ҳужум чизиғида тўп сурган. Париж клуби Франция чемпионатида муваффақиятларга эришган бўлса-да, мазкур юлдузли таркиб билан Чемпионлар лигасида ғолиб чиқа олмаган.
