Роналдиньонинг футболга қайтиши: шунчаки реклама лойиҳасими ёки ҳақиқий камбэк?
46 ёшли бразилиялик афсона Роналдиньо профессионал футболга қайтишга тайёрланмоқда. Италиянинг учинчи дивизионида иштирок этувчи «Равенна» клуби собиқ футболчи якшанба куни майдонга тушишини маълум қилди.
Жорий йилнинг июнь ойида «Равенна» Роналдиньо билан шартнома имзолаганини эълон қилганида, кўпчилик буни шунчаки реклама лойиҳаси сифатида қабул қилганди. Ахир футбол тарихидаги энг севимли футболчилардан бири 46 ёшида фаолиятини қайта бошлашига ишониш қийин эди.
Бироқ бу сафар ҳаммаси жиддийга ўхшайди. 2005 йилги «Олтин тўп» соҳиби Италия чемпионатининг учинчи дивизионида тўп сурувчи «Равенна» сафида майдонга тушади. Клуб тарихида илгари ҳеч қачон А Серияда иштирок этмаган.
«Равенна» президенти Игнацио Сиприани дастлабки кунларданоқ Роналдиньо маҳаллий рақиб «Форли»га қарши дерби учрашувида дебют қилишини орзу қилаётганини яширмаган эди. Эндиликда бу режа амалга ошиши кутилмоқда. Бразилиялик футболчи якшанба куни Бруно Бенелли стадионида бўлиб ўтадиган С Серия учрашувида иштирок этиши мумкин.
Хўш, аслида нима бўлмоқда? Роналдиньо нега футболга қайтмоқда? Бу фақат битта учрашув учунми ёки бразилиялик афсона ҳақиқатан ҳам фаолиятини давом эттирмоқчими?
«Жого бонито» тимсоли
Игнацио Сиприани 2024 йил июнь ойида ўзи туғилиб ўсган шаҳарнинг «Равенна» клубини сотиб олганида, асосий мақсади ёшларни футболга ошно қилиш эканини таъкидлаган эди. Унинг фикрича, бунинг энг яхши йўли болалигидан мухлислик қилиб келган футболчиси Роналдиньони жамоага олиб келиш эди.
«Менимча, футболдан Роналдиньочалик завқ ва муҳаббат уйғотадиган бошқа футболчи йўқ», — деган эди Сиприани Gazzetta dello Sport нашрига берган интервьюсида.
Дарҳақиқат, Роналдиньони ёқтирмайдиган футбол мухлисини топиш қийин. У бутун дунёда ҳурмат ва меҳр қозонган, ўзига хос ўйин услуби билан «жого бонито» — чиройли футбол тимсолига айланган афсоналардан биридир.
Бироқ Сиприанининг режасида битта жиддий муаммо бор эди. Роналдиньо 2018 йилда, 37 ёшида футболчилик фаолиятини якунлаган, профессионал даражада эса охирги марта 2015 йилда «Флуминенсе» сафида майдонга тушган эди.
Шунга қарамай, Сиприани ва бразилиялик собиқ футболчи ўртасида яқин дўстлик шаклланган. Уларни Роналдиньонинг «Милан»даги фаолияти давомида тез-тез бориб турган машҳур Джаннино ресторани собиқ ҳаммуаллифи Лоренсо Тонетти таништирган.
Шу сабабли «Равенна» раҳбари Роналдиньога профессионал футболга қайтиш таклифини билдирганида, бразилиялик футболчи дарҳол рози бўлган.
«Ронни билан ҳаммаси шундай кечади. Агар завқланиш ва одамларга қувонч улашиш имконияти бўлса, у ҳеч қачон ортга чекинмайди», — дея таъкидлаган Сиприани.
Бу шунчаки маркетинг лойиҳаси эмас
Роналдиньонинг ҳаётдан завқ олишни яхши кўриши ҳеч кимга сир эмас. У август ойида Равеннада ташкил этилган тантанали тадбирда мухлислар томонидан катта ҳаяжон билан кутиб олинганидан чуқур таъсирланганини яширмаган.
«Мен айнан шунинг учун қайтдим! Энди тушундингизми?» — деган эди у ўзини кутиб олган мухлисларга қарата.
Шунга қарамай, журналистлар Роналдиньо ҳақиқатан ҳам расмий учрашувда майдонга тушадими ёки йўқми, деган саволга аниқ жавоб ололмаган эди. Сиприани футболчи камида бир марта жамоа сафида ўйнашини, якшанба кунги учрашувдан кейин эса яна майдонга тушиши мумкинлигини айтган.
Бироқ бу келишув фақат футбол билан чекланмайди.
«Роналдиньо ўзининг R10 номли спорт кийимлари брендини ҳам йўлга қўймоқчи. Бу борада Майкл Жордан моделига ўхшаш лойиҳани амалга оширишни режалаштиряпмиз. “Равенна” эса ушбу бренд либосларини киядиган биринчи жамоа бўлади», — деган эди клуб президенти.
Ҳамкорликнинг тижорий самараси аллақачон сезила бошлаган. Италиянинг Манескин рок гуруҳи аъзоси Дамиано Давид август ойида ижтимоий тармоқларда Роналдиньо исми туширилган «Равенна» либосини қаердан сотиб олиш мумкинлиги ҳақида сўраган. Бироқ чекланган миқдорда ишлаб чиқарилган дастлабки либослар аллақачон сотилиб бўлинган эди.
Кейинчалик маҳсулотлар захираси тўлдирилди ва ҳозирда Роналдиньо билан боғлиқ турли эсдалик буюмлари ҳамда либосларни интернет орқали ва стадиондан харид қилиш мумкин.
Клуб якшанба кунги дербига бўлган катта талаб сабабли стадионда қўшимча махсус жойларни ҳам тайёрлаган.
Энг қизиғи, Роналдиньо «Равенна»га фақат футболчи сифатида қўшилмаяпти.
«Роналдиньо бу ерга ўз фаолиятидаги сўнгги голни уришдек ўзига хос ва романтик мақсад билан келди. Бироқ унинг клубдаги иштироки шунчаки юзаки ҳаракат ёки жамоамиз ҳақида гап-сўзларни кўпайтиришга қаратилган маркетинг лойиҳаси эмас. Роналдиньо клуб акциядорларидан бирига ҳам айланади», — деган Сиприани.
«Комо»нинг навбатдаги лойиҳасими?
Ҳозирча асосий эътибор Роналдиньонинг якшанба кунги учрашувда майдонга қайтишига қаратилган. «Равенна» бош мураббийи Андреа Мандорлини бразилиялик футболчи тахминан 30 дақиқа ўйнашини маълум қилган.
Қизиғи, Роналдиньо жамоага келганидан кейин илк бор машғулотларда фақат жума куни иштирок этган. Шунга қарамай, унинг майдонга тушиши катта шов-шувга сабаб бўлмоқда.
Учрашув чипталари одатдаги нархидан икки баравар қиммат сотилмоқда. Бундан ташқари, мазкур воқеа учун стадионда махсус «R10» номли вақтинчалик трибуна ҳам барпо этилган.
«Равенна» президенти Роналдиньо туфайли бутун футбол оламининг эътибори одатда кўпчилик назаридан четда қоладиган Италия қуйи дивизионига қаратилаётганидан мамнун.
«Жаҳон чемпионати вақтида Роналдиньо ва «Равенна» ҳақидаги хабарлар бутун дунёга тарқалди. Бу кичик шаҳарлардаги футбол клублари ҳам халқаро миқёсда эътибор қозониши мумкинлигини кўрсатди. Агар биз чемпионатга бўлган қизиқишни ошира олсак, бундан бутун лига манфаат кўради. Бу телетрансляция ҳуқуқлари, ҳомийлик шартномалари ва стадионларга ташриф буюрувчилар сонига ҳам ижобий таъсир қилади», — дея фикр билдирган Сиприани.
Аслида, Роналдиньо билан боғлиқ лойиҳа «Равенна» учун янада катта мақсадлар сари ташланган илк қадам ҳисобланади.
«Буни очиқ айтаман: «Равенна» А Серияга чиқиши ва келажакда Европа миқёсида рақобатлашиши керак. Бунинг учун вақт, сабр ва мустаҳкам инфратузилма зарур. Аммо биз айнан шу йўналишда ҳаракат қиляпмиз», — деган клуб президенти.
Унинг таъкидлашича, Роналдиньо жамоага фақат бир кечалик футболчи сифатида келмаган. У клубнинг халқаро элчиси ва узоқ муддатли лойиҳасининг ҳамкорига айланади.
Сиприани «Равенна»нинг юқори дивизионларга кўтарилиши учун Роналдиньонинг машҳурлиги етарли эмаслигини яхши тушунади. Шу сабабли у «Милан»нинг собиқ бош директори ва спорт директори Ариедо Браидани клуб вице-президенти лавозимига жалб қилганини ҳам муҳим ютуқ деб ҳисоблайди. Ҳозирда 80 ёшда бўлган Браида клуб лойиҳасига катта тажриба ва ишонч олиб кириши кутилмоқда.
Шу сабабли «Равенна»ни аллақачон Италиянинг яна бир истиқболли лойиҳаси — «Комо» билан таққослашмоқда.
«Бундай таққослаш биз учун фахр, албатта. Аммо асосий фарқ шундаки, клубимизнинг эгалиги маҳаллий ва у бевосита жамиятимиз билан боғлиқ. Равенна — менинг уйим. Бутун умримдаги орзум шу ҳудуддаги ёш футбол мухлисларини ўз шаҳрининг клубига мухлислик қилишга ундаш бўлган», — дейди Сиприани.
Клуб раҳбарининг сўзларига кўра, ҳозирда янги ва замонавий машғулот маркази қурилмоқда. Лойиҳа келаси йилнинг январь ойига қадар якунланиши режалаштирилган. Шундан сўнг стадионни янгилаш ва келажакда офислар ҳамда «Hotel Cipriani» мажмуасини ўз ичига оладиган янги арена қуриш масаласи кўриб чиқилади.
«Бизда режалар ва катта мақсадлар кўп. Роналдиньо лойиҳаси эса буларнинг барчаси учун бошланғич нуқта, холос», — дея хулоса қилган «Равенна» президенти.
