Xitoyning yirik kompaniyalari Kilian Mbappe bilan hamkorlikni to‘xtatdi
“Real Madrid” va Fransiya terma jamoasi hujumchisi Kilian Mbappe Xitoyda yuzaga kelgan mojaro sabab ikki yirik homiylik shartnomasidan ayrildi. Dongpeng ichimliklar kompaniyasi hamda Mengniu sut mahsulotlari ishlab chiqaruvchisi futbolchi bilan hamkorlikni to‘xtatganini rasman ma’lum qildi. Bu haqda AFP agentligi xabar bermoqda.
Manbaga ko‘ra, internetda tarqalgan videoda Mbappe Xitoyning sobiq rahbari Mao Szedun tasviri bilan bog‘liq mem haqida hazillashgani aytilmoqda. Ushbu lavha mamlakat ijtimoiy tarmoqlarida keskin munozaralarga sabab bo‘lgan. Kompaniyalar esa milliy tuyg‘ularga hurmatsizlik sifatida baholangan har qanday xatti-harakatni qabul qilmasligini ta’kidlagan.
Dongpeng va Mengniu futbolchi bilan barcha tijoriy aloqalarni zudlik bilan to‘xtatish haqida bayonot berdi. Voqea Xitoyning Weibo ijtimoiy tarmog‘ida eng ko‘p muhokama qilingan mavzulardan biriga aylandi. Biroq AFP mutaxassislari tarqalgan videoning haqiqiyligini mustaqil ravishda tasdiqlay olmagan.
Ma’lumot uchun, 27 yoshli Mbappe 2026-yilgi “Oltin to‘p” mukofoti uchun kurashda Harri Keyndan keyin ikkinchi o‘rinni egalladi. Mukofot topshirish marosimi 26-oktabr kuni London shahrida bo‘lib o‘tdi.
