Ronaldu munosib xayrlashuvsiz ketdi: Portugaliyada afsonaga bo‘lgan munosabat muhokamalarga sabab bo‘ldi
Krishtianu Ronalduning Portugaliya terma jamoasidagi faoliyatini yakunlashi futbol jamoatchiligida keng muhokamalarga sabab bo‘lmoqda. 41 yoshli hujumchi 5-noyabr kuni milliy jamoadan ketishini e’lon qilgan, biroq uning faoliyati katta xayrlashuv uchrashuvisiz yakunlangan. Mazkur holat ko‘plab muxlislar va taniqli sportchilarning e’tiroziga sabab bo‘ldi.
Ronalduning terma jamoadan ketishi bosh murabbiy Jorje Jezush bilan yuzaga kelgan kelishmovchiliklar ortidan sodir bo‘lgan. Portugaliya futbol federatsiyasi afsonaviy hujumchi sharafiga tantanali xayrlashuv tadbiri tashkil etish niyatini bildirgan. Biroq Observador nashrining xabariga ko‘ra, futbolchining o‘zi hozircha xayrlashuv uchrashuvini o‘tkazishni istamayapti.
Sobiq UFC chempioni Habib Nurmagomedov ham Ronalduning ketishiga munosabat bildirdi. U portugaliyalik futbolchi “Real Madrid”, “Yuventus” va “Manchester Yunayted”dan ham munosib xayrlashuvsiz ketganini eslatdi. Habibning fikricha, Ronaldu futbol tarixidagi eng buyuk sportchilardan biri bo‘lib, uning xizmatlariga munosib hurmat ko‘rsatilishi kerak.
Ma’lumot uchun, Krishtianu Ronaldu 2003–2026-yillar davomida Portugaliya terma jamoasi safida 234 ta uchrashuv o‘tkazib, 146 ta gol urgan. U milliy jamoasi bilan 2016-yilgi Yevropa chempionatida hamda ikki bor UEFA Millatlar ligasida g‘olib chiqqan. Portugaliya futbol federatsiyasi uning xizmatlarini alohida tadbir orqali e’tirof etish rejasidan voz kechmagan, ammo xayrlashuv marosimining sanasi hozircha e’lon qilinmagan.
