Ivan Boshkovich: «O‘yin sifati nuqtayi nazaridan bundan ko‘prog‘iga loyiq edik»
Bugun Superliganing 27-turiga start berildi. Toshkentdagi «Lokomotiv» stadionida «Bunyodkor» klubi «Xorazm»ni qabul qildi.
O‘yinda «Bunyodkor» 1:2 hisobida mag‘lubiyatga uchradi va o‘yindan keyingi matbuot anjumanida yutqazgan jamoa ustozi Ivan Boshkovich qatnashdi.
— O‘yin juda qiziqarli va sifatli o‘tdi, deb o‘ylayman. Jamoamiz tomonidan ham yaxshi futbol namoyish etildi. Futbolchilarimdan talab qilganimdek o‘ynadik. O‘yin sifati nuqtayi nazaridan, ehtimol, bundan ham ko‘proq narsaga loyiq edik. Biroq vaziyatlardan yaxshiroq foydalana olmadik. Nazarimda, gollarni realizatsiya qilishda biroz oqsandik.
Bilasiz, O‘zbekiston chempionatida raqobat kuchayib bormoqda. O‘zbekiston futbolining saviyasi o‘smoqda, jamoalar sifatli futbol namoyish etmoqda. Bu esa bizga ham yanada yaxshiroq o‘ynash imkoniyatini beradi.
Mavsum yakuniga qadar oldimizda yana to‘rtta uchrashuv bor. Kurashni davom ettiramiz. Hozirgi eng muhim vazifamiz — oldimizga qo‘yilgan maqsadni amalga oshirish. Buning uchun jamoamizda yetarlicha salohiyat bor. Faqat shu tarzda ishlashda, mashg‘ulot o‘tkazishda va o‘ynashda davom etishimiz kerak. Ishonamanki, barchasi yaxshi bo‘ladi.
— «Bunyodkor» so‘nggi gollarni o‘xshash vaziyatlardan o‘tkazib yubordi. Raqiblar qanotdan hujum qilib, to‘pni jarima maydonchasiga uzatishmoqda va gol urishmoqda. Masalan, «Mash’al» bilan o‘yinda Akramov, bugun esa Izzatov va Pirmuxamedov shunday vaziyatlardan foydalanishdi.
Bu tasodifmi yoki himoyada nimadir yetishmayaptimi? Nazarimda, qanotdan uzatmalar amalga oshirilayotganda himoyachilaringiz biroz e’tiborsizlikka yo‘l qo‘yishmoqda. Bu esa takrorlanib kelayotgan holat. Bundan tashqari, darvozabon ham ayrim vaziyatlarda jamoani qutqarib qola olmadi. Siz bu holatga qanday izoh berasiz?
— Albatta, biz nafaqat ushbu raqibni, balki barcha jamoalarni o‘rganamiz. Raqiblar ham bizni o‘rganishadi. Har bir jamoa raqibining kuchsiz tomonlaridan foydalanishga harakat qiladi. Biz ham o‘z ustunliklarimizni ishga solib, raqibning zaif nuqtalaridan foydalanishga intilamiz.
Bugungi o‘yinga kelsak, ikkita golni standart vaziyatlardan o‘tkazib yubordik, deb o‘ylayman. Birinchi gol autdan keyingi vaziyatda yuzaga keldi. Hozircha bu epizodlarni to‘liq tahlil qilib ulgurmadim. Takroriy lavhalarni ko‘rishim, yana bir bor o‘rganib chiqishim kerak.
Ha, autdan keyingi vaziyatda jamoamizning reaksiyasi sust bo‘ldi. Raqibga aniq ustunlik yaratishiga imkon berdik va shu lahzada himoyadagi bo‘shliqdan foydalanishdi.
Ikkinchi golga kelsak, nazarimda, to‘g‘ri harakat qildik. Ammo raqib juda chiroyli zarba bilan vaziyatni golga aylantirdi. Biz himoyadagi vazifalarimizni bajarishga harakat qildik, lekin futbolda bunday holatlar ham uchrab turadi. Epizodlarni ko‘rib chiqib, yana bir bor tahlil qilamiz.
— Bir qator mutaxassislar Superligadagi jamoalar haqida gapirar ekan, «Bunyodkor» bilan o‘ynash oson emasligini ta’kidlashadi. Jamoangizdan cho‘chishadi. Futbolchilaringizning harakati, agressiv o‘yini, yuqori pressingi va maydondagi intilishi raqiblarga noqulaylik tug‘dirmoqda. Qizig‘i, jamoangiz turnir jadvalida yuqori o‘rinlarda bo‘lmasa-da, ko‘pchilik «Bunyodkor»ga qarshi o‘ynashdan xavotir oladi. Bunga qanday izoh berasiz?
— Murabbiy sifatida men ham shu fikrdaman. Hech kim yaxshi harakatlanadigan, agressiv o‘ynaydigan, yuqori pressing qiladigan va raqibga bosim o‘tkazadigan jamoaga qarshi o‘ynashni xohlamaydi.
Bundan tashqari, biz to‘p bilan ham sifatli harakat qilishga intilamiz. Bu futbolchilarning mahoratiga bog‘liq. Jamoamizda texnik jihatdan yaxshi tayyorlangan, jismoniy va funksional imkoniyatlari yuqori bo‘lgan iqtidorli futbolchilar bor. Shuning uchun bizga qarshi o‘ynash raqiblar uchun oson emas.
Agar mutaxassislar haqiqatan ham shunday fikrda bo‘lsa, bu men uchun quvonarli. Ammo eng muhimi, kimga qarshi o‘ynashimizdan qat’i nazar, maydonda o‘z futbolimizni namoyish etishimiz kerak.
— Jamoangizda yosh futbolchilar ko‘p. Ular orasida tajribalilar ham bor. Masalan, kimnidir alohida ajratish qiyin, chunki har birining o‘z ustunliklari mavjud. Lekin yoshlar bilan tajribali futbolchilar o‘rtasidagi raqobat haqida nima deysiz? Tajribali futbolchilarning jamoadagi o‘rni qanchalik muhim?
— Har bir futbolchining o‘z ustunliklari bor. Jamoamiz tarkibi asosan yosh futbolchilardan iborat. Albatta, ularda tajriba yetishmasligi mumkin. Shuning uchun jamoada sog‘lom raqobat bo‘lishi kerak. Futbolchilarimizning rivojlanib borayotgani, o‘sishga intilayotgani meni quvontiradi.
Shu bilan birga, Abdumavlon Abdujalilov kabi tajribali futbolchilar biz uchun juda muhim. Bunday futbolchilar nafaqat o‘z o‘yin sifati, balki maydondagi tajribasi va muloqoti bilan ham jamoaga yordam berishadi. Ular go‘yo maydondagi murabbiylardek. O‘z tajribalari bilan yoshlarga yo‘l ko‘rsatishadi.
Shu bois bunday futbolchilarning jamoada bo‘lishi juda muhim. Kimning maydonga tushishidan qat’i nazar, har bir futbolchi o‘z mehnati va harakati bilan hurmatga loyiq.
Jarohatlar, sariq kartochkalar va boshqa holatlarni ham hisobga olib, keyingi o‘yinlarda kim maydonga tushishini ko‘ramiz. Hozircha har bir futbolchi o‘z imkoniyatidan foydalanishga harakat qilmoqda. Kelgusida ham kim yaxshi holatda bo‘lsa, o‘sha o‘ynaydi.
— Asosiy tarkib e’lon qilinganida darvozabonlar ro‘yxatida Abdumavlon Abdujadilov va Muhammadyusuf Sobirov nomlarini ko‘rdik. Avvalroq Federiko Botti jamoa bilan birga emasligi haqida eshitgandim. Bu ma’lumot to‘g‘rimi? U jamoani tark etdimi? Klub bilan shartnomasi tugadimi?
— Ha, u jamoadan ketgan. Shartnoma bilan bog‘liq qanday kelishuv bo‘lganini aniq bilmayman. Ammo u hozir mashg‘ulot jarayonida ishtirok etmayapti. Jamoa bilan birga shug‘ullanishga kelmayapti. Menimcha, uning klub bilan o‘ziga yarasha kelishuvi bor», - deya Ivan Boshkovichning so‘zlarini keltiradi Tribuna.uz jurnalisti.
