Роналду биргина изоҳи билан ёш футболчиларнинг орзусини амалга оширди
Португалиялик футбол юлдузи Криштиану Роналду ижтимоий тармоқда қолдирган биргина изоҳи орқали ёш футболчиларнинг ноодатий орзусини амалга оширишга ёрдам берди. «Ориентал Лиссабон» клуби тарбияланувчилари португалиялик ҳужумчидан жавоб олиш мақсадида махсус чақириқ ташкил қилган эди.
Ёш футболчилар мураббий кўрсатмаларисиз эркин машғулот ўтказиш ҳуқуқини қўлга киритиш учун ижтимоий тармоқдаги постига 3000 та лайк, 200 та изоҳ ва Криштиану Роналдунинг шахсий жавобини олишлари керак бўлган. Дастлабки икки шарт қисқа вақт ичида бажарилган, бироқ учинчи шартни амалга ошириш анча қийин туюлган.
Кутилмаганда Роналду ёш футболчиларнинг мурожаатига жавоб қайтариб, уларга эркин машғулотдан завқланишларини тилаган. Португалиялик юлдузнинг изоҳидан кейин мазкур пост ижтимоий тармоқларда кенг тарқалган. Хабарга кўра, пост 466 мингта лайк, 11 мингта изоҳ ва 70 мингдан ортиқ улашишга эришган.
Маълумот учун, 41 ёшли Криштиану Роналду айни пайтда Саудия Арабистонининг «Ан-Наср» клубида фаолиятини давом эттирмоқда. Португалиялик футболчи ижтимоий тармоқларда ҳам энг катта аудиторияга эга спортчилардан бири ҳисобланади.
