Превью. «Андижон» - «Хоразм»
«Бобур арена»да яна катта футбол байрами. Суперлиганинг 19-турида «Андижон» жамоамиз «Хоразм»ни қабул қилади.
Клубларнинг Ўзбекистон чемпионатидаги илк ўйини 1996 йилдан бошланган. Ўшанда "Хоразм" "Динамо Урганч" номи билан, "Андижон" эса "Наврўз" деб аталган. Баҳс эса 1:1 ҳисобида якунланган.
Ушбу жамоалар чемпионатда шу пайтга қадар 19 ўйинда майдонга тушишган. «Андижон»да 11 та, «Хоразм»да 4 ғалаба бор. 4 та учрашувда кучлар тенг келган. Тўплар нисбати 40\19 «Андижон» фойдасига.
Жорий мавсум биринчи даврада Урганчда ўтказилган ўйинда жамоамиз сафарда 0:3 ҳисобидаги ғалабани қўлга киритган. Ўшанда голларга Андроникашвили, Иминов ва Черан муаллифлик қилишган.
«Андижон» ўз майдонида сўнгги бор «Хоразм»ни 2025 йилда мағлуб этган ва ўшанда 3:2 натижаси қайд этилган. Қизиғи, ўша йили жамоамиз меҳмонда ҳам "Хоразм"ни 3:2 ҳисобида таслим қилган.
Жамоаларнинг охирги 5 та тўқнашуви
04.05.2026. "Хоразм" - "Андижон" - 0:3
21.11.2025. "Андижон" - "Хоразм" - 3:2
26.06.2025. "Хоразм" - "Андижон" - 2:3
16.11.2022. "Андижон" - "Хоразм" - 3:1
16.10.2022. "Хоразм" - "Андижон" - 0:1
Ушбу жамоаларнинг ўзаро ўйинларидаги энг йирик ҳисоб 2006 йилнинг 19 август куни содир бўлган бўлиб, унда жамоамиз рақибини 7:1 ҳисобида тор-мор келтирган.
Айни пайтда турнир жадвалида «Андижон» 9-ўринда 24 очко билан, «Хоразм» эса 11-ўринда 20 очко билан бормоқда.
