«Пахтакор» мухлисларнинг стадион шароити ҳақидаги шикоятларига жавоб қайтарди
Тошкентнинг "Пахтакор" клуби "Ан-Наср"га қарши ўтказилган ОФК Элит Чемпионлар лигаси учрашувидан кейин стадион шароити юзасидан билдирилган эътирозларга муносабат билдирди.
Ижтимоий тармоқларда айрим мухлислар стадион ўриндиқларининг ҳолати ҳамда секторларга киришда юзага келган қийинчиликлар ҳақида хабарлар тарқатган эди.
Клуб матбуот хизматига кўра, "Ан-Наср" билан учрашув олдидан кўпроқ томошабинни қабул қилиш мақсадида стадион трибуналарида таъмирлаш ишлари олиб борилган. Жумладан, бир қатор секторлардаги ўриндиқлар таъмирланган ёки алмаштирилган, айрим қаторлар ва ўриндиқларга рақамлар қўйилган.
Бироқ клуб стадиондаги барча ўриндиқларни янгилаш ишлари ҳали якунига етмаганини тан олди. Қолган таъмирлаш ва рақамлаш ишлари босқичма-босқич давом эттирилиши режалаштирилган.
Шунингдек, учрашувдан аввал якшанба ва душанба кунлари стадион ҳудуди ҳамда ўриндиқлар тозалангани таъкидланди. Шунга қарамай, айрим ўриндиқларнинг чанглангани ва эскирганларини алмаштириш зарурати мавжудлиги инкор этилмади.
"Пахтакор" клуби учрашувга ташриф буюриб, стадионда ажойиб муҳит яратган барча мухлисларга миннатдорлик билдирди.
