«Нефтчи»нинг навбатдаги рақиби: Роналду бошчилигидаги «Ан-Наср» ҳақида нималарни билиш керак?
12 октябрь куни Фарғонанинг «Нефтчи» клуби ОФК Элит Чемпионлар лигаси 2026/27 йилги мавсумининг 2-турида Саудия Арабистонининг «Ан-Наср» жамоасига қарши майдонга тушади.
Фарғоналиклар қитъа мусобақасини муваффақиятли бошлади. Жамоа дастлабки турда Ироқнинг «Ал-Қува Ал-Жавия» клубини Зоран Марушичнинг 83-дақиқада урган ягона голи эвазига 1:0 ҳисобида мағлуб этди.
Энди «Нефтчи»ни сафарда таркиби юлдуз футболчилар билан тўлдирилган ва Осиёнинг энг кучли клубларидан бири саналадиган «Ан-Наср»га қарши жиддий синов кутмоқда.
«Ан-Наср» Саудия Арабистони футболидаги энг машҳур ва совриндор клублардан бири ҳисобланади. Ар-Риёд жамоасига 1955 йил 24 октябрь куни асос солинган.
Клуб мухлислар орасида «Ал-Алами» — «Жаҳон клуби» ҳамда «Форис Нажд» — «Нажд рицарлари» номлари билан танилган.
Жамоанинг анъанавий ранглари сариқ ва кўк. Сариқ ранг Саудия Арабистони чўлларини, кўк эса Арабистон яриморолини ўраб турган денгизларни ифодалайди.
Ар-Риёдликлар уй учрашувларини Подшоҳ Сауд университети ҳудудида жойлашган «Ал-Аввал Парк» стадионида ўтказади.
25 минг томошабинга мўлжалланган арена замонавий инфратузилмаси ва «Ан-Наср» мухлисларининг фаол қўллаб-қувватлаши билан ажралиб туради.
Айнан шу стадион 12 октябрь куни «Нефтчи»ни қабул қилади.
«Ан-Наср» мамлакат чемпионатида 11 марта бош совринни қўлга киритган. Шунингдек, клуб Подшоҳ кубоги, Валиаҳд шаҳзодаси кубоги ва Саудия Арабистони Суперкубогида ҳам бир неча бор ғолиб чиққан.
Жамоа узоқ йиллардан буён «Ал-Ҳилол» ва «Ал-Иттиҳод» билан Саудия Арабистони футболидаги етакчилик учун рақобат қилиб келмоқда.
2025/26 йилги мавсум «Ан-Наср» учун алоҳида аҳамият касб этди. Клуб етти йиллик танаффусдан сўнг яна мамлакат чемпионлигини қўлга киритди.
Ар-Риёдликлар 34 учрашувда 28 та ғалаба, 2 та дуранг ва 4 та мағлубият қайд этиб, 86 очко жамғарди. «Ал-Ҳилол»дан икки очко кўп тўплаган «Ан-Наср» 91 та гол билан мавсумнинг энг сермаҳсул жамоаси ҳам бўлди.
«Ан-Наср»нинг халқаро майдондаги энг муҳим муваффақиятлари 1998 йилга тўғри келади.
Жамоа ўша йили Осиё кубоги эгалари кубоги финалида Жанубий Кореянинг «Сувон Самсунг Блювингс» клубини 1:0 ҳисобида мағлуб этиб, қитъа совринини қўлга киритган.
Орадан кўп ўтмай, «Ан-Наср» Осиё Суперкубогида ҳам зафар қучди ва бир йил ичида қитъа миқёсидаги иккита нуфузли совринга эга чиқди.
Ушбу натижалар клубга 2000 йилда Бразилияда ташкил этилган клублар ўртасидаги илк Жаҳон чемпионатида иштирок этиш имконини берди.
«Ан-Наср» гуруҳ босқичида «Реал Мадрид», «Коринтианс» ва «Ража Касабланка» билан беллашди. Саудия Арабистони вакили Марокаш клубини 4:3 ҳисобида мағлуб этган бўлса-да, кейинги босқичга чиқа олмади.
«Ан-Наср» бош мураббийи — австралиялик мутахассис Анж Постекоглу.
61 ёшли мураббий 2026 йилнинг июль ойида Ар-Риёд клуби бошқарувини қабул қилиб олди ва 2028 йилгача мўлжалланган шартнома имзолади.
Постекоглу фаолияти давомида Австралия миллий терма жамоаси, Япониянинг «Ёкогама Ф. Маринос», Шотландиянинг «Селтик», Англиянинг «Тоттенҳэм» ва «Ноттингем Форест» жамоаларида ишлаган.
Мутахассис Австралия терма жамоаси билан 2015 йилги Осиё кубогида ғолиб чиққан. Шунингдек, «Тоттенҳэм» билан 2024/25 йилги УЕФА Европа лигасининг бош совринини қўлга киритган.
«Ан-Наср» таркиби нафақат Саудия Арабистони, балки бутун Осиё миқёсида энг кучлилардан бири саналади.
Жамоанинг асосий юлдузи — беш карра «Олтин тўп» соҳиби Криштиану Роналду. Португалиялик ҳужумчи 2023 йил январидан буён «Ан-Наср» шарафини ҳимоя қилиб келмоқда.
41 ёшли футболчи 2025/26 йилги Саудия Арабистони чемпионатида 28 та гол уриб, жамоанинг чемпионликка эришишида муҳим роль ўйнади.
«Ан-Наср»нинг ҳужум чизиғида Роналду билан бир қаторда бир қатор таниқли футболчилар ҳам тўп тепмоқда.
Сенегаллик Садио Мане, франциялик Кингсли Коман ва португалиялик Жоау Феликс Ар-Риёд клубининг ҳужумдаги асосий қуроллари ҳисобланади.
Шунингдек, бразилиялик дарвозабон Бенто, франциялик ҳимоячи Муҳаммад Симакан ва испаниялик Иниго Мартинес ҳам «Ан-Наср» таркибидан жой олган.
Бу футболчиларнинг аксарияти Европанинг кучли чемпионатлари ва нуфузли клубларида катта тажриба тўплаган.
«Ан-Наср» фақат хорижлик юлдузларга таянмайди. Клуб таркибида Саудия Арабистони миллий терма жамоасининг бир қатор футболчилари ҳам бор.
Дарвозабон Навоф Ал-Ақидий, ҳимоячи Абдулиллоҳ Ал-Амрий, ярим ҳимоячилар Абдуллоҳ Ал-Хайбарий ва Айман Яҳё, шунингдек, ҳужумчи Абдуллоҳ Ал-Ҳамдон мамлакат миллий терма жамоаси сафида ҳам фаолият олиб бормоқда.
Уларнинг барчаси 2026 йилги Жаҳон чемпионати олдидан Саудия Арабистони терма жамоасининг якуний тайёргарлик йиғинига жалб қилинган футболчилар қаторидан жой олган.
Шу тариқа, Элит Осиё Чемпионлар лигасидаги илк учрашувини ғалаба билан бошлаган «Нефтчи» иккинчи турда таркиби юлдуз футболчилар билан тўлдирилган, амалдаги Саудия Арабистони чемпионига қарши майдонга тушади.
«Ан-Наср» — «Нефтчи» учрашуви 12 октябрь куни Ар-Риёддаги «Ал-Аввал Парк» стадионида бўлиб ўтади. Беллашув Тошкент вақти билан соат 23:15 да бошланади.
