Модрич «Милан»да фаолиятини давом эттириш қарорини изоҳлади
«Милан» ярим ҳимоячиси Лука Модрич Жаҳон чемпионатидан кейин ҳам футболчилик фаолиятини давом эттиришга қарор қилгани ҳақида гапирди.
Аввалроқ хорватиялик футболчи 2026 йилги жаҳон чемпионатидан кейин бутсаларини михга илиши мумкинлиги тахмин қилинган эди. Бироқ июль ойининг охирида «россонерилар» Модрич билан шартнома 2027 йилнинг ўрталарига қадар узайтирилганини эълон қилди.
«Мен «Милан»да ўзимни яхши ҳис қиляпман. Бу ерда мени қадрлашларини ва яхши кўришларини ҳис қиляпман. Клуб ва янги бош мураббий билан суҳбатлашганимдан кейин қолишга қарор қилдим.
Ҳали ҳам ўзимни ажойиб ҳис қиляпман, футболни севаман ва ундан завқ оляпман. Жамоага фойда келтиришда давом этиш ва ёш футболчиларга ёрдам бериш учун қолишни истадим.
«Милан» учун бор кучимни сарфлайман. Биргаликда қандай натижаларга эришишимиз мумкинлигини вақт кўрсатади», — деди Модрич CBS Sports нашрига берган интервьюсида.
Эслатиб ўтамиз, сентябрь ойида 41 ёшини қарши олган тажрибали ярим ҳимоячи шанба куни «Интер»га қарши Милан дербисида (3:1) жамоаси ғалабасига ҳисса қўшди. Модрич учрашувни бошидан охиригача майдонда ўтказди.
