Лига комиссари: \"Тез ёрдам ва сухандон ўйинга кеч қолган, шунингдек интернет ҳамда принтер мавжуд бўлмаган\"
18-21 апрель кунлари Суперлига 6-тур учрашувлари ўтказилди. Ушбу турнинг ҳар бир ўйинларига бағишланган лига комиссари билдиргисини эътиборингизга ҳавола қиламиз:
“Бухоро” 1:3 “Насаф”
Тез тиббий ёрдам машинаси стадионга ўз вақтида етиб келмаслиги оқибатида учрашув 9 дақиқа кеч бошланган ва мазкур ҳолат жонли эфирга ўз таъсирини кўрсатган.
Шунингдек, стадион сухандони кечикиши оқибатида, у билан боғлиқ бўлган барча масалада кечикиш кузатилган. Регламентнинг 16.35-банди эса эътиборсиз қолдирилган.
Микст-зона тартибга солинмаган, клуб матбуот хизмати мазкур масалага етарлича эътибор қаратмаган.
Регламентнинг 15.14-бандини бузиш орқали тўп олиб берувчи болаларга нисбатан ҳурматсизликка йўл қўйилган.
Комиссар хонасида интернет ишламаган. Қўшимчасига, принтер мавжуд бўлмаган.
“Бухоро” футбол клуби мезбонлик билан боғлиқ талабларга нисбатан лоқайд муносабатда бўлгани учун унга нисбатан жарима интизом чораси қўлланилади.
