Дунёнинг энг яхши ҳужумчиси аниқланди: Ямал иккинчи, Месси учинчи, Роналду саккизинчи
Халқаро профессионал футболчилар федерацияси (FIFPRO) 2026-йилги рамзий терма жамоани аниқлаш учун ўтказилган овоз бериш натижаларини эълон қилди. Ҳужумчилар орасида Мадриднинг “Реал” клуби футболчиси Килиан Мбаппе энг кўп овоз тўплади. Ламин Ямал иккинчи, Лионель Месси учинчи, Криштиану Роналду эса саккизинчи ўринни эгаллади. Бу ҳақда FIFPRO матбуот хизмати хабар бермоқда.
Манбага кўра, Мбаппе 46 фоиз овоз билан рейтингда етакчилик қилган. “Барселона” ҳужумчиси Ламин Ямал 37,4 фоиз натижа билан иккинчи поғонадан жой олган. Кучли учликни “Интер Майами” етакчиси Лионель Месси 29,5 фоиз овоз билан якунлаган. “Манчестер Сити” вакили Эрлинг Ҳоланд эса 28,4 фоиз натижа қайд этиб, тўртинчи бўлган.
Рейтингнинг бешинчи поғонасини 27,6 фоиз овоз билан “Бавария” ҳужумчиси Гарри Кейн эгаллаган. Кейинги ўринлардан Майкл Олисе, Хвича Кварацхелия ва Криштиану Роналду жой олган. Португалиялик футболчи 13,2 фоиз овоз тўплаган. Кучли ўнликни Усмон Дембеле ва Рафинья якунлаган. Овоз бериш натижасида Мбаппе, Ямал, Месси ва Ҳоланд FIFPROнинг рамзий терма жамоасига киритилган.
Маълумот учун, FIFPROнинг 2026-йилги рамзий терма жамоасини аниқлашда 73 мамлакатдан 19 806 нафар профессионал эркак футболчи иштирок этди. Овоз беришда 2025-йил 4-августдан 2026-йил 19-июлгача бўлган даврдаги натижалар ҳисобга олинди. Ҳар бир иштирокчи ўз позициясидаги энг яхши уч нафар футболчини танлаган.
