Дунёнинг энг яхши дарвозабони аниқланди: Куртуа иккинчи, Сафонов кучли ўнталикка кирмади
Халқаро профессионал футболчилар ассоциацияси (FIFPRO) 2026 йилнинг энг яхши дарвозабонлари рейтингини эълон қилди. Овоз бериш натижаларига кўра, Лондоннинг «Арсенал» клуби дарвозабони Давид Райя дунёнинг энг яхши дарвозабони деб топилди. Белгиялик Тибо Куртуа иккинчи ўринни эгаллаган бўлса, «ПСЖ» вакили Матвей Сафонов кучли ўнталикка кира олмади. Бу ҳақда FIFPRO нашри хабар бермоқда.
Манбага кўра, сўровномада 19 806 нафар профессионал футболчи иштирок этган. Давид Райя 51,9 фоиз овоз билан рейтингда етакчилик қилган. Мадриднинг «Реал» клуби дарвозабони Тибо Куртуа 38,6 фоиз натижа билан иккинчи, «Челси» вакили Эмилиано Мартинес эса 32,7 фоиз овоз билан учинчи ўринни эгаллаган.
Кейинги поғоналардан Жанлуижи Доннарумма («Манчестер Сити»), Алиссон Беккер («Ливерпуль»), Жоан Гарсия («Барселона»), Унаи Симон («Атлетик»), Мануэль Нойер («Бавария»), Возинья («Коло-Коло») ва Диогу Кошта («Порту») жой олган. Россия терма жамоаси ҳамда «ПСЖ» дарвозабони Матвей Сафонов эса дастлабки ўн футболчи қаторига киритилмаган.
Маълумот учун, овоз беришда футболчиларнинг 2025 йил 4 августидан 2026 йил 19 июлигача бўлган даврдаги ўйинлари инобатга олинган. Ҳар бир иштирокчи ўзи муносиб деб билган уч нафар дарвозабонга овоз бериш имкониятига эга бўлган. Рейтингда биринчи ўринни эгаллаган Давид Райя 2026 йилги FIFPRO рамзий терма жамоасидан ҳам жой олган.
