Туркияда ғалаба қозонган боксчига мухлислар ҳужум қилди
Туркиянинг Истанбул шаҳрида ўтказилган профессионал бокс оқшоми катта можаро билан якунланди. Франция шарафини ҳимоя қилаётган Мурад Алиев маҳаллий боксчи Умут Чамқирон устидан ғалаба қозонганидан сўнг, томошабинлар ҳужумига учради. Воқеа акс этган видеолавҳалар ижтимоий тармоқларда кенг тарқалди. Бу ҳақда talkSPORT нашри хабар бермоқда.
Манбага кўра, Алиев ва Чамқирон WBC Silver камари учун 12 раунд давомида беллашган. Ҳакамлар қарори билан француз боксчиси ғолиб деб топилган. Бироқ жангдан кейин Алиевнинг трибунадагиларга қарата қилган қўпол ишораси вазиятни кескинлаштирган.
Аввалига спортчилар ўртасида тортишув бошланган, кейинчалик эса бир гуруҳ мухлис рингга бостириб кирган. Улар Алиевга мушт туширган, айримлари эса стул ва бошқа буюмлар билан ҳужум қилган. Хавфсизлик ходимлари боксчини рингдан олиб чиқишга ҳаракат қилган бўлса-да, тартибсизлик бир муддат давом этган.
Маълумот учун, Мурад Алиев асли россиялик бўлиб, халқаро мусобақаларда Франция шарафини ҳимоя қилади. У Токио Олимпиадасида ҳам қатнашган. Истанбулдаги ҳодисадан кейин боксчи ўз ишораси билан рақиби томонидан белдан пастга йўлланган зарбаларга эътибор қаратмоқчи бўлганини билдирган.
