Энтони Жошуа Тайсон Фьюри билан жангдан кейин Даниэль Дюбуага қарши реванш ўтказмоқчи
Британиялик боксчи Энтони Жошуа Тайсон Фьюрига қарши жангдан кейинги режаларини белгилаб олган. Собиқ жаҳон чемпиони Даниэль Дюбуага учраган мағлубияти учун реванш олишни истамоқда. Бу ҳақда унинг промоутери Эдди Хирн маълум қилди.
Манбага кўра, Хирн BetOnline лойиҳасига берган интервьюсида Жошуанинг энг кучли рақибларга қарши жанг қилиш истаги сақланиб қолганини таъкидлаган. Промоутернинг айтишича, британиялик боксчи фаолияти давомида мағлуб бўлган аксарият рақиблари билан қайта тўқнаш келган ва Дюбуа билан ҳам ҳисоб-китобни тенглаштирмоқчи.
Бироқ мазкур реваншнинг ташкил этилиши Жошуанинг Фьюрига қарши жангдаги натижасига ҳам боғлиқ. Хирн икки боксчи ўртасидаги навбатдаги тўқнашув катта қизиқиш уйғотишига ишонмоқда. Шунингдек, келажакда Филип Хргович билан жанг ташкил этилиши эҳтимоли ҳам тилга олинган.
Маълумот учун, Энтони Жошуа 2024-йил сентябрида Лондоннинг «Уэмбли» стадионида Даниэль Дюбуага нокаут билан мағлуб бўлган. У 2026-йил 11-декабрь куни Кардифф шаҳрида Тайсон Фьюрига қарши рингга чиқиши режалаштирилган. Дюбуа билан реванш ҳозирча расман тасдиқланмаган.
