Shota Arveladze «So‘g‘diyona» bosh murabbiyiga aylanishi mumkin
Gruziyalik taniqli mutaxassis Shota Arveladze yana O‘zbekiston futboliga qaytishi mumkin.
Sobiq futbolchi va murabbiyning Jizzaxning «So‘g‘diyona» klubini boshqarishi ehtimoli muhokama qilinmoqda.
Arveladze uchun O‘zbekiston futboli begona emas. U 2017–2020 yillarda Toshkentning «Paxtakor» klubida bosh murabbiy sifatida faoliyat yuritgan va jamoa bilan bir qator sovrinlarni qo‘lga kiritgan.
2022 yilda u Angliyaning «Xall Siti» klubini boshqardi. Keyinchalik Turkiyaga qaytib, «Fotih Karagyumryuk» va yana «Qosimposho»da ishladi.
Jizzax klubida 2026 yilning mart oyida murabbiylar shtabida o‘zgarish yuz bergan. Ivan Boshkovich bilan shartnoma bekor qilinib, uning o‘rniga Ulug‘bek Baqoyev tayinlangan edi. Baqoyev klub bilan yil oxirigacha shartnoma imzolagani haqida xabar berilgan.
