Ispaniyada tarixiy Bask derbisining 50 yilligi nishonlandi
Ispaniyaning “Atletik Bilbao” va “Real Sosyedad” klublari o‘rtasidagi derbida futbol tarixidagi ramziy voqealardan birining 50 yilligi nishonlandi. Ikki jamoaning sobiq sardorlari Xose Anxel Iribar va Inaksio Kortabarria uchrashuv oldidan maydonga Basklar mamlakati bayrog‘ini olib chiqdi. Bu haqda 2-noyabr kuni Reuters agentligi xabar bermoqda.
Manbaga ko‘ra, mazkur marosim 1976-yilda sodir bo‘lgan tarixiy voqeaga bag‘ishlangan. O‘sha davrda ikki klub sardorlari Basklar mamlakati bayrog‘ini birgalikda maydonga olib chiqib, futbol orqali muhim ramziy qadam tashlagan edi.
Oradan yarim asr o‘tib, klublar ushbu voqeani yana bir bor yodga oldi. Marosim ikki jamoa o‘rtasidagi sport raqobatidan tashqari, mintaqaning futbol an’analari va tarixiy xotirasini ham aks ettirdi.
Ma’lumot uchun, “Atletik Bilbao” va “Real Sosyedad” Ispaniya futbolidagi eng qadimiy mintaqaviy raqiblardan hisoblanadi. Ularning o‘zaro uchrashuvlari Bask derbisi nomi bilan mashhur.
