Abbosbek Otahonov: «Gol urishda omadimiz kelmayapti»
Superliga 24-turida "Xorazm" – "Navbahor" (1:1) uchrashuvi durang bilan yakunlandi. O‘yindan so‘ng mezbonlar himoyachisi Abbosbek Otahonov Sports24.uz sayti uchun o‘z fikrlarini bildirdi.
O‘yin haqida
"Yaxshi o‘yin bo‘ldi. Bizga ham, raqibga ham g‘alaba kerak edi. Menimcha, durang adolatli bo‘ldi. Chunki "Xorazm"da ham, "Navbahor"da ham gol urish uchun ko‘plab vaziyatlar bo‘ldi. Ammo bu vaziyatlardan ikkala jamoa ham foydalana olmadi.
Natijalar haqida
"Xorazm" anchadan beri g‘alaba qozona olmayapti. Lekin o‘yin borasida hech bir jamoadan aslo qolishganimiz yo‘q. Faqatgina bizda yaratilgan vaziyatlarni golga aylantirishda omadimiz kelmayapti. Shu sabab ko‘p ochko yo‘qotmoqdamiz. Tabiiyki, natijalardan o‘zimiz ham mamnun emasmiz.
Asosiy maqsad haqida
Superligada qolishni rejalashtirganmiz. Bu bizning asosiy vazifa va maqsadimiz hisoblanadi. Qolgan bahslarda ijobiy natijalarni qayd etib, Superligada jon saqlab qolishga harakat qilamiz.
Jamoaga moslashuv haqida
Jamoada muhit borasida hech qanday muammo yo‘q. Shu sababli men ham moslashib ketishda qiyinchilikka duch kelganim yo‘q. Ko‘p o‘yinchilar bilan ilgari boshqa jamoalarda o‘ynaganman, ularni yaxshi taniyman. Bu ham mening moslashib ketishimga yordam berdi", - deydi Otahonov.
