Педри: «Қилган хатоларимиз учун жазоландик»
«Барселона» ярим ҳимоячиси Педри «Реал Мадрид»га қарши Эл-Класикодаги мағлубиятдан сўнг жамоасининг ўйинини танқид қилди. Испаниялик футболчининг фикрича, каталонияликлар биринчи бўлимда ўз даражасида ҳаракат қила олмаган.
«DAZN» нашрига берган интервьюсида Педри жамоа танаффусга қадар суст ўйнаганини, иккинчи бўлимда эса вазиятни яхшилаб, ҳисобни тенглаштиришга муваффақ бўлганини таъкидлади. Бироқ «Барселона» рақибнинг қарши ҳужумига қарши тура олмади ва якунда 1:2 ҳисобида мағлуб бўлди.
«Биринчи бўлимда тўпни жуда секин ҳаракатлантирдик ва кўплаб оддий хатоларга йўл қўйдик. Бундай жамоаларга қарши ўйнаганда бунинг учун жазоланамиз», — деди Педри.
Футболчи кейинги учрашувларда яхшироқ натижа кўрсатиш зарурлигини қайд этди. Унинг сўзларига кўра, жамоа мухлислар учун Эл-Класикода ғалаба қозонишни истаган, аммо бу сафар омад каталонияликларга кулиб боқмади.
Шунга қарамай, Педри чемпионлик пойгаси ҳали якунланмаганини таъкидлади. Унинг фикрича, битта Эл-Класикодаги мағлубият Ла Лига чемпиони ким бўлишини ҳал қилмайди. «Барселона» энди бу учрашувни ортда қолдириб, навбатдаги ўйинларга эътибор қаратиши керак.
