Игорь Литовка қандай қилиб “Андижон”га келиб қолганини айтди
“Андижон” клубининг собиқ дарвозабони, ҳозирда Грузиянинг “Гагра” клуби сафида тўп суряпган Игорь Литовка Sports24.uz сайтига интервью берди.
Литовка суҳбат чоғида нега дарвозабон бўлгани, “Андижон”га қандай келиб қолгани ва футболчилик фаолиятини якунлаганидан сўнг нима билан шуғулланиши ҳақида айтиб ўтди.
“Дарвозабон – бу катта масъулият, бу жамоанинг ярми. Бу кучли психология ва катта босим. Шунинг учун бўлса керак, биз майдондаги футболчилардан кўра кўпроқ фаолият олиб борамиз. Ёшимиз улғайгани сари ўйинни яхшироқ ҳис қиламиз.
“Андижон”га қандай келиб қолдим? Мени Улуғбек Мирзаев таклиф қилганди. Оиламиз билан Хорватияда эдик ва ўз кучимни янги чемпионатда синаб кўришга қарор қилдим.
Дарвозабонлар майдондаги футболчилардан кўра кўпроқ ўйинга берилиб кетишади. Айни шунинг учун кўпинча дарвозабонлар яхши мураббийга айланишади. Ҳозирча бош мураббий бўлиш ҳақида ўйламаяпман, аммо дарвозабонлар билан ишлаш – бу мен ўзимни футболчилик фаолиятимни якунлагандан кейин кўраётган нарсам”, – дейди Литовка.
Маълумот учун, Игорь Литовка “Андижон”даги фаолияти давомида 42 та ўйинда майдонга тушиб, 45 та гол ўтказиб юборган. Унинг Transfermarkt'даги нархи 50 минг евроға баҳоланмоқда.
