“Астон Вилла” Жейми Каррагерга қарши судга мурожаат қилиш фикридан қайтди
Англиянинг “Астон Вилла” клуби собиқ футболчи ва телеэксперт Жейми Каррагерга қарши суд ишини бошлаш режасидан воз кечди. Бунга “Ливерпул”нинг собиқ ҳимоячиси клуб ва унинг мухлисларига нисбатан ишлатган қўпол сўзлари учун узр сўрагани сабаб бўлди. Бу ҳақда The Guardian нашри хабар бермоқда.
Манбага кўра, можаро Каррагернинг “Stick to Football” подкастидаги чиқишидан кейин бошланган. У “Астон Вилла” бош мураббийи Унаи Эмери “Манчестер Юнайтед”ни бошқариш имкониятини кўриб чиқиши кераклигини айтган. Ушбу фикр мухлисларнинг норозилигига сабаб бўлгач, Каррагер уларга нисбатан ҳақоратли ибора ишлатган.
“Астон Вилла” раҳбарияти футбол эксперти томонидан билдирилган фикрларни қабул қилиб бўлмас деб баҳолаб, унга қарши ҳуқуқий чоралар кўришини эълон қилган эди. Бироқ Каррагер кейинчалик ижтимоий тармоқлар орқали узр сўраб, сўзлари ноўрин чиққанини тан олган. Шундан сўнг клуб раҳбарияти можарони судгача олиб бормасликка қарор қилган.
Маълумот учун, 48 ёшли Жейми Каррагер футболчилик фаолиятининг асосий қисмини “Ливерпул” сафида ўтказган. Фаолиятини якунлагач, у Sky Sports телеканалида футбол эксперти сифатида ишлай бошлаган. Унинг “Астон Вилла” билан боғлиқ можароси Англия футбол жамоатчилигида кенг муҳокамаларга сабаб бўлди.
