Қаҳрамон Асланов \"эл-класико\"даги йўқотишлар ҳақида фикр билдирди
Журналист Қаҳрамон Асланов Испания кубоги финали олдидан жамоалардаги йўқотишлар ҳақида қуйидагича ёзди:
""Реал" учун Мбаппе асосий йўқотиш, шубҳа йўқ, аммо "Барселона"га, келганда, менимча, Левандовскидан ҳам кўра, Балденинг ўрни кўпроқ билинса керак.
Рафинья орқали билинади. Маълумки, Рафинья вингер эмас, Флик ундан марказроқда, чап яримқанотда фойдалана бошлагандан бери, унинг ўйини очилиб кетди. Балде эса бу боғламда муҳим фигура - у доим қанотни кенгайтиради, яъни аут чизиғида ҳужумни қувватлаш орқали, рақиб қанот ҳимоячисини четга тортади. Бу рақибдаги ўнг қанот ва марказий ҳимоячи ўртасида кичик бўш зона пайдо қилади - айнан Рафинья фойдаланадиган ҳудуд.
Мартин ҳам ҳужумга қўшилиши мумкин, аммо Балдечалик фаол эмас, натижада, Балдесиз ўйинларда қанотни кенгайтиш Рафиньяга қоляпти. Бу эса жарима майдонида камроқ пайдо бўлиш дегани, Рафиньядаги айнан кутилмаганлик эффекти йўқолиб қолади.
Балким "Реал" ҳам Мартинни олдинга чиқишга қўймаслик учун ўнг қанотига урғу берар, кўпроқ ҳужумлар ўша томондан амалга оширилиши мумкин", - деб ёзади Асланов
