Navbahor va Andijon o‘rtasidagi 3-tur uchrashuvi yakuni
28 mart kuni mahalliy vaqt bilan soat 19:30da Namanganda "Navbahor" va "Andijon" jamoalari maydon uzra to‘qnashdi. O‘yin qiziqarli va voqealarga boy kechdi. Uchrashuvning yakuniy hisobi 2:2 durang bo‘ldi.
Birinchi bo‘limning ikkinchi daqiqasidayoq Zabihillo O‘rinboyev "Andijon" darvozasini ishg‘ol etdi. Namangan klubi himoyachisi Gulherme Guedesning o‘z darvozasiga urib qo‘ygan to‘pi andijonliklarga hisobni tenglashtirish imkonini berdi - 1:1.
Ikkinchi bo‘limning 52-daqiqasida Abbos G‘ulomov "Navbahor" klubini oldinga olib chiqdi - 2:1. Uchrashuvning 74-daqiqasida "Andijon" yarim himoyachisi qizil kartochka olib, maydonni tark etdi, natijada jamoa kamchilikda o‘yinni davom ettirdi. 90 daqiqa tugagach, hakam yana to‘qqiz daqiqa qo‘shdi. 90+3-daqiqada Saidazamat Mirsaidov sariq kartochka oldi, 90+5-daqiqada esa Mirsaidov yana bir sariq kartochka olib, qizil kartochka bilan jazolanib, maydonni tark etishga majbur bo‘ldi. Qo‘shimcha vaqtning oxirgi daqiqalarida, 90+8-daqiqada Umid Ergashev o‘z darvozasiga to‘p kiritib qo‘yib, "Andijon"ga hisobni tenglashtirishga yordam berdi - 2:2.
O‘zbekiston Superligasi. Uchinchi tur:
Navbahor - Andijon - 2:2
Gollar: O‘rinboyev 2, G‘ulomov 52 - Guedes 7 (avtogo’l), Ergashev 90+8 (avtogo’l)
