“Navbahor” - “Andijon”: Vodiy derbisida ustunlik kim tomonda?
Bugun, 28-mart kuni O'zbekiston Superligasi 3-turidan o'rin olgan markaziy uchrashuvda “Navbahor” va “Andijon” o'zaro to'qnash keladi.
Ta'kidlashning hojati yo'q, har qanday vaziyatda ham ushbu jamoalar o'rtasidagi bahs anshlag holatda, jiddiy qarama-qarshilik ruhi ostida o'tadi.
Hozirga qadar “Navbahor” va “Andijon” milliy chempionatimiz doirasida 56 bor ro'baro' kelgan. Ularning 27 tasida namanganliklar, 13 tasida esa andijonliklarning qo'li baland kelgan. 16 ta uchrashuv durang bilan yakunlangan. To'plar nisbati esa 80-57, “Navbahor” foydasiga.
Mazkur jamoalar o'rtasidagi o'yinlarda eng yirik hisob 2004-yilgi mavsumda qayd etilgan. O'shanda “lochinlar” “burgutlar”ni 5:0 hisobida mag'lub etgan.
Eslatib o'tamiz, “Navbahor” - “Andijon” o'rtasidagi uchrashuv bugun Toshkent vaqti bilan soat 19:30 da Namangandagi “Markaziy” stadionida start oladi.
