Islombek Ismoilov «Neftchi» bosh murabbiyligiga tayinlandi
O‘zbekiston o‘smirlar jamoasi sobiq bosh murabbiyi Islombek Ismoilov ham Superliga klubida ish boshladi. Farg‘ona viloyati hokimligi matbuot xizmati "Neftchi" klubi ushbu yosh mutaxassis bilan shartnoma tuzilgani haqida e’lon qildi.
"Marg‘ilon shahrida tug‘ilgan Islombek Ismoilov yosh bo‘lishiga qaramay, milliy futbolimizda sezilarli natijalarga erishib, murabbiylik sohasida eng istiqbolli kadrlaridan biri sifatida tanilgan. U boshqargan U-17 terma jamoasi zamonaviy o‘yin uslubi, intizom va xarakter bilan mamlakatimiz sharafini munosib himoya qildi", – deyiladi klub matbuot xizmati xabarida.
"Neftchi" klubi oldiga "chempionlikni saqlab qolish va mustahkamlash, Osiyo Chempionlar Ligasi elit bosqichida muvaffaqiyatli ishtirok etish, jamoaning raqobatbardosh va uzluksiz rivojini ta’minlash" vazifalari qo‘yilgani qayd etilgan.
