Ikki rekordchi futbolchi murabbiy sifatida to'qnash keladi
19 aprel O‘zbekiston Superligasi 6-turi doirasidagi Qashqadaryo derbisi bo‘lib o‘tadi. Unda G‘uzorning "Sho‘rtan" va Muborakning "Mash‘al" klublari kuch sinashishadi.
Mazkur bahs Qarshi shahridagi "Markaziy" stadionda bo‘lib o‘tadi.
E’tiborli jihati ikkala jamoa bosh murabbiylari O‘zbekiston chempionatlarida o‘z yo‘nalishida mutlaq rekordchilar hisoblanadi.
"Sho‘rtan" ustozi Anvar Berdiev O‘zbekiston chempionatlari tarixida eng ko‘p gol urgan futbolchi hisoblanadi. "Neftchi"da yulduzli onlarini o‘tkazgan Berdiev O‘zbekiston oliy ligasida jami 505 ta o‘yinda maydonga tushib, 225 ta gol urgan. Hozirga qadar hech qaysi futbolchi oliy ligamizda bunday ko‘p gol urmagan.
"Mash‘al" bosh murabbiyi Asror Aliqulov esa o‘yinlar soni bo‘yicha tengsiz bo‘lib turibdi. Futbolchilik faoliyati davomida "Mash‘al", "Nasaf", "Paxtakor", "Sho‘rtan" va "Dinamo" klublarida to‘p tepgan Aliqulov hisobida oliy ligada 520 ta o‘yin mavjud.
