«Everton» Rashfordni ijaraga olmoqchi
«Everton» «Manchester Yunayted» hujumchisi Markus Rashfordni mavsum oxiriga qadar ijaraga olish niyatida. Bu haqda TEAMtalk nashri xabar berdi.
«Qizil iblislar» rahbariyati bunday variantni ko‘rib chiqishga tayyor. Biroq moliyaviy masalalar va futbolchining shaxsiy pozitsiyasi sababli kelishuv amalga oshmasligi mumkin.
28 yoshli angliyalik futbolchi joriy mavsumda Angliya Premyer-ligasida faqat bir marta to‘liq uchrashuv o‘tkazgan. Oktabr oyidagi terma jamoalar o‘yinlari uchun berilgan tanaffusdan keyin u «Tottenhem»ga qarshi bahsda (1:1) faqat qo‘shimcha vaqtda zaxiradan maydonga tushdi.
«Lids»ga qarshi uchrashuvda (1:2) zaxirada qoldirildi, «Bornmut»ga qarshi bahsni esa (0:3) jarohati sababli o‘tkazib yubordi. Biroq ushbu jarohat uni uzoq muddatga safdan chiqarishi kutilmayapti. Shuningdek, futbolchi joriy mavsumda yana besh marta zaxiradan maydonga tushgan.
Transfer oldidagi asosiy to‘siq Rashfordning haftalik maoshi hisoblanadi. Uning maoshi taxminan 325 ming funt sterlingni tashkil etadi. Hatto «Manchester Yunayted» to‘lovlarning bir qismini o‘z zimmasiga olgan taqdirda ham, hozirda sotuvga qo‘yilgan «Everton» uchun bu jiddiy moliyaviy yuk bo‘ladi.
Bundan tashqari, hujumchining o‘zi ham Angliya chempionatidagi o‘rta darajadagi klubdan ko‘ra, katta maqsadlar uchun kurashadigan jamoada to‘p surishni afzal ko‘rmoqda.
Rashford o‘tgan mavsumni «Barselona»da ijara asosida o‘tkazdi. U Ispaniya chempionatida 32 ta uchrashuvda 8 ta gol urdi va mamlakat chempioniga aylandi. Shuningdek, Chempionlar Ligasida ham 5 ta gol muallifi bo‘ldi.
