Александр Хомяков: «Биз тезроқ мағлубиятни унутиб кейинги ўйин ҳақида ўйлашимиз керак»
Суперлига 9-туридан ўрин олган "Бухоро" – "Пахтакор" баҳси 0:1 ҳисобида якун топди. Ўйиндан кейин мезбонлар бош мураббийи Александр Хомяков матбуот анжуманида иштирок этди.
— Ўйин ҳақида фикрингиз?
- Тушунарлики, биз ҳам ғалаба қозонишни ва мухлисларимизни хурсанд қилишни хоҳлаган эдик. Лекин хоҳиш билан амалга ошириш бир-биридан фарқ қилади. Нима билан боғлиқ билмадим-у, биринчи таймни жуда ёмон ўтказдик, ҳеч нарса ўхшамади. Режамиз иш бермади. Тўп назоратини, тўпни қабул қилиб олишни йўқотдик, майдонда нотўғри жойлашдик. Катта иштиёқ билан ўйин намойиш этамиз деб ўйлагандик, лекин гол ўтказиб юбордик. Рақиб устунликни ўз қўлига олди ва тўп киритишнинг уддасидан чиқди. Иккинчи таймда етакчиликни қўлга олдик дейолмайман-у, аммо рақибга халал бериб кўришга уриндик. Фақат ҳужумда умуман "тишсиз" ҳаракат қилдик. Битта ўша тўп қўлга тегдими йўқми вазиятни ҳисобга олмасак, бошқа вазият ярата олмадик. Аламли мағлубиятга учрадик. Рақибни ғалаба билан табриклайман.
— Мана учинчи ўйиндирки жамоангиз дастлабки 15 дақиқа ичида гол ўтказяпти. Бу нимa билан боғлиқ?
- Бу ҳақда мен ҳам ўйладим ва футболчиларга айтгандик. Бугун ўйиндан олдин ҳимояда эҳтиёт бўлиш кераклигини уқтирдик. Биз аста-секин гол уришни хоҳлаяпмиз ва бунинг натижасида муаммолар юзага келяпти. Ҳамма ҳужумга ўтиб кетади, чизиқлар бўш қолади, кейин гол ўтказамиз. Тўғри ўйин кўрсатишимиз керак эди. ОКМК билан баҳсни олинг, учрашув бошланган, лекин биз ҳамон дастлабки 15 дақиқаликда кийим алмаштириш хонасида эдик. Албатта, буни яна таҳлил қиламиз. Сиз тўғри савол бердингиз, жуда оддий тўпларни ўтказяпмиз. Буни тўғрилаш керак.
— Охирги ўйинларда ҳакамларнинг тез-тез хатога йўл қўяётгани футболчилар ва мураббийларга қандай таъсир қиляпти? Футболчилар бу борада босимни ҳис қилмаяптими?
- Ҳакамлар ишига баҳо бериш бизнинг вазифамиз эмас. Бу борада жамоамиз футболчиларда босим йўқ деб ўйлайман. Албатта, ўйин пайти турли ҳиссиётлар бўлади. Менимча, Суперлигага савияси баланд ҳакамлар қўйиляпти. Шу боис мен уларни муҳокама қилмоқчи эмасман, бунга ҳаққим ҳам йўқ.
— Иккита кетма-кет мағлубият жамоангизга қай даражада таъсир қилади?
- Биз тезроқ мағлубиятни унутиб кейинги ўйин ҳақида ўйлашимиз керак. Агар майдонга руҳий тушкунлик билан чиқсак, бу умуман фойда бермайди. Мағлубият аламли, лекин ҳеч ким бундан кафолатланмаган. Бугун мамлакатиимизнинг энг яхши жамоаларидан бирига қарши ўйнадик, буни тўғри қабул қилиш керак. Рақиб сафида миллий терма жамоа ўйинчилари бор, бу ҳам устунлик берди. "Пахтакор" ростан яхши жамоа. Биз эса бугунги мағлубиятдан дарс чиқаришга ҳаракат қиламиз.
