Россия клуби ўзбек футболчисига ўринбосар топди
Россия Премьер-лигасида ҳаракат қилаётган Қозоннинг «Рубин» клуби ўзбекистонлик марказий ҳимоячи Рустам Ашурматовнинг ўрнини эгаллайдиган футболчини топди. Жамоа Гондурас терма жамоаси аъзоси — 27 ёшли Дениль Мальдонадони ўз сафига қўшиб олди.
Маҳаллий манбаларга кўра, «Рубин» бу трансфер учун Румыниянинг «Университатя Клуж» клубига 800 минг евро тўлаган. Transfermarkt портали Мальдонадонинг бозор қийматини 1,8 миллион евро деб баҳолаган.
Ушбу харид жамоа ҳимоя чизиғини янгилаш бўйича режанинг бир қисми сифатида амалга оширилди. Мальдонадо жисмоний тайёргарлиги, ҳаводаги курашларда устунлиги ва ўйинни тўғри англаш қобилияти билан «Рубин» мураббийлари томонидан юқори баҳоланмоқда.
Айни пайтда, Рустам Ашурматовнинг «Рубин» билан шартномаси якунланмоқда ва у катта эҳтимол билан ўз фаолиятини Ўзбекистонда — Фарғонанинг «Нефтчи» клубида давом эттиради. Мутассаддиларнинг таъкидлашича, бу қарор ҳимоячи учун мантиқий қадам бўлиб, у янги жамоасида асосий ўйинчига айланиши ва ёшларга тажрибасини улашиши мумкин.
