Роналду бешинчи йилдирки, «Олтин тўп» овоз бериш жараёнида иштирок этмади
Португалия терма жамоаси ва «Ал-Наср» клуби сардори Криштиану Роналду France Football нашри билан юзага келган келишмовчилик сабабли кетма-кет бешинчи йил «Энг яхши ёш футболчи» номинацияси бўйича «Олтин тўп» овоз бериш жараёнида иштирок этишдан бош тортди. Бу ҳақда L'Équipe нашри хабар берди.
Манба маълумотларига кўра, Франция футболининг собиқ юлдузлари Зинедин Зидан ва Мишель Платини ҳам мазкур номинация бўйича овоз беришда иштирок этмаган.
Жорий йилда «Энг яхши ёш футболчи» соврини «Барселона» ҳужумчиси Ламин Ямалга насиб этди.
Эслатиб ўтамиз, 2021 йилда ўша пайтда France Football бош муҳаррири бўлган Паскаль Ферре Роналду унга ўзининг асосий мақсади фаолиятини Лионель Мессидан кўпроқ «Олтин тўп» совринлари билан якунлаш эканини айтганини маълум қилган эди.
Кейинчалик Роналду Ферренинг бу гапларини рад этиб, уни ёлғончиликда айблаган. Шунингдек, португалиялик юлдуз «Олтин тўп» билан боғлиқ барча тадбирларни бойкот қилишни бошлаган.
