«Навбаҳор» 2-даврага Беларусда тайёргарлик кўради
«Навбаҳор» иккинчи даврага тайёргарликни Беларусда олиб борадиган бўлди.
«Жамоамиз аъзолари, эртадан, яъни, 16 июлдан ушбу мавсумнинг иккинчи давра баҳсларига тайёргарликни бошлашади. «Лочинлар» чоршанба тонгида Тошкентдан Минск шаҳрига жўнаб кетишади.
Сергей Лушан шогирдлари давралар оралиғидаги танаффусда Беларус пойтахтида ўқув-машғулот йиғинини ўтказишади. Хориж йиғини доирасида назорат учрашувлари ўтказишни режалаштирган. Рақиб жамоалар ва назорат ўйинларининг санаси борасида кейинчалик аниқ маълумот берамиз.
Вакилларимиз 29 июл куни юртимизга қайтишади», — деб ёзади клуб матбуот хизмати.
Маълумот учун, Наманган жамоаси Суперлигада биринчи даврадан сўнг 26 очко билан 7-ўринни эгаллаб турибди ва «лочинлар» иккинчи даврадаги дастлабки ўйинини 2 август куни Самарқандда «Динамо»га қарши ўтказади.
