Магуайр: «Бу «МЮ» сафида «Энфилд»да ўтказган сўнгги ўйиним бўлиши мумкин»
«Манчестер Юнайтед» ҳимоячиси Харри Магуайр жамоасининг АПЛ 8-турида «Ливерпуль» устидан қўзонган ғалабаси (2:1) ҳақида фикр билдирди.
«Мен бу ерда етти йилдан бери ўйнаяпман, шунинг учун бу ғалаба мен учун жуда муҳим эди. Ҳозир менинг клуб билан шартномамнинг сўнгги йили кетмоқда, эҳтимол, бу «МЮ» сафида «Энфилд»да ўтказган сўнгги ўйиним бўлиши мумкин. Шу сабабли бу учрашувни ғалаба билан эслаб қолиш мен учун алоҳида аҳамиятга эга», — деди Магуайр.
Маълумот учун, «Манчестер Юнайтед» сўнгги марта «Ливерпуль»ни «Энфилд»да 2016 йилнинг январь ойида мағлуб этганди. Ўшанда АПЛнинг 2015/2016 йилги мавсумида «қизил иблислар» 1:0 ҳисобида ғалаба қозонган.
Жорий мавсумдаги ўйинда эса Магуайр 84-дақиқада ғалаба голини урди. Ҳимоячининг клуб билан тузган амалдаги шартномаси 2026 йилнинг ёзида якунга етади.
