Ламин Ямал Францияга қарши пеналти ишлаган вазиятда қўл билан ўйнадими?
Ламин Ямал Францияга қарши пеналти ишлаган вазиятда қўл билан ўйнадими?
Ламин Ямал ЖЧ-2026 ярим финалида Францияга қарши баҳсда Испания терма жамоаси учун пеналти ишлади.
Далласда бўлиб ўтаётган учрашувда Микел Оярсабал 11 метрлик жарима зарбасини аниқ амалга ошириб, Луис де ла Фуэнте шогирдларини ҳисобда олдинга олиб чиқди. Бироқ бош ҳакам Иван Бартоннинг қарори атрофида баҳсли ҳолат юзага келди.
Люка Дин Ямалга аниқ тегиб кетгандек кўринган бўлса-да, Франция томони бундан аввал испаниялик вингер қўл билан ўйнаганини даъво қилди.
ITV Sport қоидалар бўйича таҳлилчиси Кристина Ункел бу фикрга қўшилмади. У салвадорлик ҳакамнинг майдондаги қарорини тўғри деб топди. Ункел Диннинг ҳаракатини ушбу турнирда аввалроқ қайд этилган Харри Кейннинг Мексикага қарши ва Лука Модричнинг Англияга қарши вазиятларига қиёслади.
— Бу ҳолатни таҳлил қилиш тўғри. Алоқа Ямалнинг енг қисмига тўғри келган, бу эса қўлнинг бир қисми ҳисобланмайди.
Шу сабабли бу вазият қўл билан ўйнаш сифатида қайта кўриб чиқилмаслиги керак эди. Пеналти ўз кучида қолиши лозим. Харри Кейн билан бўлган вазиятдаги каби, улар тўп учун курашга киришишган, аммо рақибга тегмаслик имкониятига ҳам эга бўлишган, — деди Ункел.
Гари Невилл эса Диннинг ҳимоядаги ҳаракатини танқид қилди ва у Ямалнинг қаердалигини сезиши керак бўлганини айтди.
— Ҳа, — деди Невилл ITV Sport эфирида Диннинг Ямалнинг жойлашувига кўпроқ эътибор бериши керакмиди, деган саволга жавобан. — Айниқса, ташқи томонда шундай иқтидорли футболчи турганида, унинг қаердалигини билиш шарт. Дин аввалига танасини ёпиб олди, у Ямал қаерда эканини сезиши керак эди. Модрич ва Кейн билан ҳам шундай вазият бўлганди. Аммо Дин атрофида нима бўлаётганига кўпроқ эътиборли бўлиши лозим эди. У Ямалнинг у ерда турганини умуман сезмаган, бундан бехабар бўлган.
