Neymar jarohatdan tiklandi va JCH-2026 da Shotlandiyaga qarshi o‘ynashga tayyor
Braziliya terma jamoasi hujumchisi Neymar jarohatdan so‘ng umumiy guruhda birinchi to‘liq mashg‘ulotni o‘tkazdi. “Santos”ning 34 yoshli futbolchisi guruh bosqichining yakuniy turi oldidan milliy terma jamoa mashg‘ulotini to‘liq yakunladi, deb xabar beradi ESPN.
17 may kuni “Santos” safidagi o‘yinda olingan o‘ng boldir mushagi jarohati tufayli forvard JCH-2026 dagi dastlabki ikki o‘yinni o‘tkazib yubordi. Braziliya terma jamoasi tarixidagi eng yaxshi to‘purar (128 o‘yinda 79 gol) 25 iyun kuni Mayamida C guruhining Shotlandiya terma jamoasiga qarshi hal qiluvchi bahsida maydonga tushishi kutilmoqda.
Rafinyaning o‘ng son orqa mushagidan olgan jarohati tufayli safdan chiqqani fonida hujumchining qaytishi Karlo Anchelotti shogirdlari uchun ayniqsa muhim.
Ayni paytda Braziliya 4 ochko jamg‘argan va Marokash terma jamoasi bilan birinchi o‘rinni bo‘lishib turibdi, raqibidan to‘plar nisbati bo‘yicha o‘zib ketmoqda.
