Mirzohid G‘ofurov: «Agar «Bunyodkor»ni mag‘lub etsak, bu jamoani ortda qoldiramiz»
O‘zbekiston Superligasining 25-turidan o‘rin olgan “Navbahor” – “Bunyodkor” jamoalari o‘rtasidagi uchrashuv arafasida “lochinar”ning 37 yoshli tajribali himoyachisi Mirzohid G‘ofurov bo‘lajak bellashuv haqidagi fikrlari bilan o‘rtoqlashdi.
— Har ikki jamoa turnir jadvalida qo‘shni bo‘lgani sababli, bo‘lajak bahs keskin va murosasiz kurashlar ostida, tomoshabop kechishi ehtimoli ancha yuqori. Ushbu o‘yinda g‘alabaga erishsak, “qaldirg‘ochlar” bilan o‘rin almashib, bir pog‘ona yuqoriga ko‘tarilamiz. Shu sababli g‘alaba uchun maydonga tushib, bu maqsadga erishish uchun bor imkoniyatimizni ishga solamiz.
Yangi bosh murabbiy Sherzod Hamidovich Jo‘rayev boshchiligida jamoamiz o‘yini va natijalarida asta-sekin ijobiy o‘zgarishlar yuz bermoqda. Bo‘lajak o‘yinda ham raqibni mag‘lub etishga harakat qilamiz.
Ishqibozlardan jamoamizni yolg‘izlatib qo‘ymasliklarini, stadionda munosib tarzda qo‘llab-quvvatlab turishlarini so‘rayman. Biz esa imkon qadar ularga quvonch ulashishga intilamiz, - dedi Mirzohid G‘ofurov klub matbuot xizmatiga.
