Harri Keyn “Bavariya” bilan yangi shartnoma imzolashga juda yaqin
Myunxenning “Bavariya” klubi hujumchisi Harri Keyn jamoa bilan yangi shartnoma imzolash arafasida ekanini ma’lum qildi. Angliyalik futbolchining aytishicha, tomonlar o‘rtasidagi muzokaralar muvaffaqiyatli davom etmoqda va kelishuv yaqin kunlarda yakunlanishi mumkin. Bu haqda Reuters agentligi xabar bermoqda.
Manbaga ko‘ra, Keyn Chempionlar ligasi doirasida “Atletiko Madrid”ga qarshi uchrashuvdan oldingi matbuot anjumanida o‘z kelajagi haqida gapirgan. Hujumchi shartnomaning asosiy bandlari bo‘yicha kelishuvga erishilganini, hozir faqat ayrim huquqiy va tashkiliy masalalar qolganini ta’kidlagan. Futbolchi yangi bitimni imzolash uchun haftalar emas, sanoqli kunlar qolganiga ishonmoqda.
Keyn “Bavariya” safidagi faoliyatidan mamnun ekanini bildirgan. U Germaniya klubiga o‘tish orqali sovrinlar qo‘lga kiritish va futbolchi sifatida yanada rivojlanishni maqsad qilgan edi. Angliyalik hujumchi yaqinda faoliyatidagi ilk “Oltin to‘p” sovriniga ham ega chiqdi. Uning ta’kidlashicha, klubdagi muhit va erishilgan natijalar Myunxenda qolish qaroriga ijobiy ta’sir qilmoqda.
Ma’lumot uchun, Harri Keyn 2023-yilda “Tottenhem”dan “Bavariya”ga o‘tgan. U myunxenliklar safida 160 ta rasmiy uchrashuvda 156 ta gol urishga muvaffaq bo‘lgan. Futbolchining amaldagi shartnomasi 2027-yil yozigacha mo‘ljallangan bo‘lib, yangi kelishuv uning klubdagi faoliyatini yana bir necha yilga uzaytirishi kutilmoqda.
